Las-Vegas shahrida O‘zbekiston vaqti bilan 9-iyul tongida UFC 290 musobaqasi bo‘lib o‘tdi.
Musobaqaning asosiy jangi yarim yengil vazn toifasida Aleksandr Volkanovski (26-2) va Yair Rodriges (15-4) o‘rtasida kechdi. Volkanovski uchinchi raunddagi zarbalar seriyasidan keyin raqibini texnik nokautga uchratdi.
Jang juda yorqin kechdi: Volkanovski, hattoki, Islom Maxachevga uchralgan mag‘lubiyatdan so‘ng ham divizion qiroli bo‘lib qolayotganini ko‘rsatdi.
Rodriges — diviziondagi eng yaxshi nomzod emas. Lekin UFC’ning siyosati sababli topda Volkanovski uchun raqiblar qolmagandi
34 yoshli Volkanovski — divizionning afsonasi: u ketma-ket 12 ta g‘alaba qayd etgan (uch marta Maks Hollouey ustidan) va 4 marta chempionlikni himoya qilgan. O‘zining vazn toifasida nomzodlar qolmaganidan so‘ng yangi chaqiriq uchun yengil vazn toifasiga o‘tdi. Islom Maxachevga qarshi jangda munosib harakat qildi, biroq mag‘lubiyatga uchradi. Shunga qaramasdan P4P reytingida yetakchiligicha qoldi.
Volkanovski — yengil vazn toifasi uchun kichik, lekin yarim yengil vazn toifasi uchun ajoyib jangchi. U universal-chempion: barcha qavatlardagi pozitsiyada mohirona harakat qiladi, raqibiga moslashadi va kurashadi (hujumda ham, himoyada ham). Aleksning hech qanday zaif tomonlari yo‘q, bu esa uni Joze Aldo bilan birgalikda yarim yengil vazn toifasida UFC afsonalaridan biriga aylantiradi.
Yair Rogriges — nostandart uslub bilan unvonga sazovor bo‘lgan sirli jangchi. 2020-yilda u yana bir yorqin jangchi Zabir Magomedsharipovga qarshi oktagonga ko‘tarilishi kerak edi, biroq ushbu jang bir necha bor qoldirilgan. Natijada, Zabit faoliyatini yakunladi, Rodriges esa ikki yil jangsiz qolib ketdi.
Uzoq tanaffusdan so‘ng Rodriges qaytdi va Maks Holloueyga yutqazib qo‘ydi. Shundan so‘ng ikkita g‘alabaga erishdi — Ortega ustidan (birinchi raundda yelkasidan jarohat oldi) va faxriy jangchi Emmet ustidan. Da’vogar uchun yaxshi rezyume bo‘lmasa-da, yarim yengil vaznda Yevloyev (7-0) va Topuriya (6-0) chempionlik unvoni sari sekin odimlayotgani hisobga olinsa, Volkanovski hali mag‘lub etmagan nomzod faqatgina Rodriges edi.
Rodriges nostandart harakatlari bilan tahdid qildi, biroq bo‘shliqlar ko‘p edi. Volkanovski esa ulardan foydalanib, raqibini uchinchi raundda mag‘lub etdi
Rodriges — UFC’dagi eng noodatiy jangchilardan biri: u aqlbovar qilmaydigan burchaklardan zarba beradi, oyoqlaridan ko‘proq foydalanadi va kutilmaganda zarbalar beradi.
“Meni noto‘g‘ri tushunmang: Volkanovskiga shubha qilish juda qiyin, lekin Yair oktagonga oldindan aytib bo‘lmaydigan omilni olib kiradi, balki bu narsani UFC 290 da amalga oshirar. Bu — Sport, undan hamma narsa sodir bo‘lishi mumkin!”, — degan edi yengil vazn toifasi chempioni Aljameyn Sterling.
Bo‘ylardagi farqqa qaramay (168 va 180 sm), Volkanovskida bir qancha ustunliklar bor edi. Birinchi raundda Aleks zarbalarsiz Yair tomon pressing uyushtirdi va darhol parterga oldi. Shu yerda Rodrigesning oyoqlar bilan ko‘p ishlaydigan ajoyib uslubi zaif tomoniga aylandi.
Ikkinchi raundda ham Yair odatdagi uslubida davom etdi — qo‘llaridan ko‘ra oyoqdan ko‘proq foydalandi. Volkanovski barchasini ko‘rib turar va o‘zini himoya qilardi. Ikkinchi daqiqada u zarbalar bilan masofani qisqartirib, yana raqibini parter holatiga oldi. Aleks parterda samaraliroq ishladi va jangni ertaroq yakunlashni maqsad qilganini bildirdi.
Uchinchi raundga kelib, Rodrigesning yuzida qon va gematomalar bor edi, u sekinlasha boshladi. U oldinga borar va raqibiga yaqinlashardi, shu tariqa Yair Volkanovskiga qarshi hujumga o‘tish imkoniyatini berardi.
Oxirgi daqiqada Rodriges qo‘llarini erkin qo‘yib, oyoq bilan zarba berayotganda, Volkanovski vaziyatdan unumli foydalanib, unga ketma-ket zarbalar bera boshladi va yerga yiqitdi.
Volkanovski — haqiqiy chempion: u tavakkal qilib, yengil vazn toifasiga ko‘tarildi va Maxachevga qarshi jang qildi. Endi esa revansh talab qilmoqda. Yarim yengil vazn toifasida u raqiblaridan qo‘rqmaydi va istiqbolli sportchilar Yevloyev hamda Topuriyalarga qarshi janglarni intiqlik bilan kutmoqda. Volkanovskining o‘zi UFC’dan buni talab qilmoqda va g‘alabadan keyin darhol Topuriyaga chaqiriq tashlagan.
Izoh (0)