Лас-Вегас шаҳрида Ўзбекистон вақти билан 9 июль тонгида UFC 290 мусобақаси бўлиб ўтди.
Мусобақанинг асосий жанги ярим енгил вазн тоифасида Александр Волкановски (26-2) ва Яир Родригес (15-4) ўртасида кечди. Волкановски учинчи раунддаги зарбалар сериясидан кейин рақибини техник нокаутга учратди.
Жанг жуда ёрқин кечди: Волкановски, ҳаттоки, Ислом Махачевга учралган мағлубиятдан сўнг ҳам дивизион қироли бўлиб қолаётганини кўрсатди.
Родригес — дивизиондаги энг яхши номзод эмас. Лекин UFC’нинг сиёсати сабабли топда Волкановски учун рақиблар қолмаганди
34 ёшли Волкановски — дивизионнинг афсонаси: у кетма-кет 12 та ғалаба қайд этган (уч марта Макс Ҳоллоуэй устидан) ва 4 марта чемпионликни ҳимоя қилган. Ўзининг вазн тоифасида номзодлар қолмаганидан сўнг янги чақириқ учун енгил вазн тоифасига ўтди. Ислом Махачевга қарши жангда муносиб ҳаракат қилди, бироқ мағлубиятга учради. Шунга қарамасдан P4P рейтингида етакчилигича қолди.
Волкановски — енгил вазн тоифаси учун кичик, лекин ярим енгил вазн тоифаси учун ажойиб жангчи. У универсал-чемпион: барча қаватлардаги позицияда моҳирона ҳаракат қилади, рақибига мослашади ва курашади (ҳужумда ҳам, ҳимояда ҳам). Алекснинг ҳеч қандай заиф томонлари йўқ, бу эса уни Жозе Алдо билан биргаликда ярим енгил вазн тоифасида UFC афсоналаридан бирига айлантиради.
Яир Рогригес — ностандарт услуб билан унвонга сазовор бўлган сирли жангчи. 2020 йилда у яна бир ёрқин жангчи Забир Магомедшариповга қарши октагонга кўтарилиши керак эди, бироқ ушбу жанг бир неча бор қолдирилган. Натижада, Забит фаолиятини якунлади, Родригес эса икки йил жангсиз қолиб кетди.
Узоқ танаффусдан сўнг Родригес қайтди ва Макс Ҳоллоуэйга ютқазиб қўйди. Шундан сўнг иккита ғалабага эришди — Ортега устидан (биринчи раундда елкасидан жароҳат олди) ва фахрий жангчи Эммет устидан. Даъвогар учун яхши резюме бўлмаса-да, ярим енгил вазнда Евлоев (7-0) ва Топурия (6-0) чемпионлик унвони сари секин одимлаётгани ҳисобга олинса, Волкановски ҳали мағлуб этмаган номзод фақатгина Родригес эди.
Родригес ностандарт ҳаракатлари билан таҳдид қилди, бироқ бўшлиқлар кўп эди. Волкановски эса улардан фойдаланиб, рақибини учинчи раундда мағлуб этди
Родригес — UFC’даги энг ноодатий жангчилардан бири: у ақл бовар қилмайдиган бурчаклардан зарба беради, оёқларидан кўпроқ фойдаланади ва кутилмаганда зарбалар беради.
“Мени нотўғри тушунманг: Волкановскига шубҳа қилиш жуда қийин, лекин Яир октагонга олдиндан айтиб бўлмайдиган омилни олиб киради, балки бу нарсани UFC 290 да амалга оширар. Бу — Спорт, ундан ҳамма нарса содир бўлиши мумкин!”, — деган эди енгил вазн тоифаси чемпиони Алжамейн Стерлинг.
Бўйлардаги фарққа қарамай (168 ва 180 см), Волкановскида бир қанча устунликлар бор эди. Биринчи раундда Алекс зарбаларсиз Яир томон прессинг уюштирди ва дарҳол партерга олди. Шу ерда Родригеснинг оёқлар билан кўп ишлайдиган ажойиб услуби заиф томонига айланди.
Иккинчи раундда ҳам Яир одатдаги услубида давом этди — қўлларидан кўра оёқдан кўпроқ фойдаланди. Волкановски барчасини кўриб турар ва ўзини ҳимоя қиларди. Иккинчи дақиқада у зарбалар билан масофани қисқартириб, яна рақибини партер ҳолатига олди. Алекс партерда самаралироқ ишлади ва жангни эртароқ якунлашни мақсад қилганини билдирди.
Учинчи раундга келиб, Родригеснинг юзида қон ва гематомалар бор эди, у секинлаша бошлади. У олдинга борар ва рақибига яқинлашарди, шу тариқа Яир Волкановскига қарши ҳужумга ўтиш имкониятини берарди.
Охирги дақиқада Родригес қўлларини эркин қўйиб, оёқ билан зарба бераётганда, Волкановски вазиятдан унумли фойдаланиб, унга кетма-кет зарбалар бера бошлади ва ерга йиқитди.
Волкановски — ҳақиқий чемпион: у таваккал қилиб, енгил вазн тоифасига кўтарилди ва Махачевга қарши жанг қилди. Энди эса реванш талаб қилмоқда. Ярим енгил вазн тоифасида у рақибларидан қўрқмайди ва истиқболли спортчилар Евлоев ҳамда Топурияларга қарши жангларни интиқлик билан кутмоқда. Волкановскининг ўзи UFC’дан буни талаб қилмоқда ва ғалабадан кейин дарҳол Топурияга чақириқ ташлаган.
Изоҳ (0)