Yuridik isteʼmolchilar tomonidan ichimlik suvi bo‘yicha qarzdorlik qoida va shartnomada belgilangan muddatda to‘lanmagan taqdirda penya tartibi joriy qilingan bo‘lib, 2023-yilning 1-may sanasidan boshlab penya hisoblash tartibi boshlangan. Bu haqda “O‘zsuvtaʼminot” AJ axborot xizmati rahbari Akmal Murodov “Daryo”ga maʼlum qildi.
Akmal Murodovning aytishicha, qoidaga ko‘ra, barcha guruh isteʼmolchilari ichimlik suv taʼminoti va suv chiqarish xizmati uchun hisobga olish priborlari mavjud bo‘lganda oxirgi uch oyning o‘rtacha sarfi bo‘yicha haq to‘laydi.
“Hisobga olish priborlari mavjud bo‘lmaganda oylik isteʼmol normasi bo‘yicha keyingi oy uchun har oyning 10-sanasiga qadar 100 foiz oldindan haq to‘lashni amalga oshirishlari lozim. To‘lovning shartnomada belgilangandan kechiktirilgan har bir kuni uchun — yuridik shaxslar 0,4 foiz, jismoniy shaxslar esa 0,1 foiz penya to‘lanishi ko‘rsatib o‘tilgan. Ammo bu ko‘rsatkich jami kechiktirilgan summaning 50 foizidan oshmasligi lozim”, — dedi “O‘zsuvtaʼminot” masʼul xodimi.
Uning taʼkidlashicha, yuridik isteʼmolchilar belgilangan muddatda to‘lanmagan taqdirda penya hisoblash tartibi joriy qilingan.
“Mazkur tartib 2023-yilning 1-may sanasidan boshlab isteʼmolchilarga penya hisoblash tartibi boshlangan. Aholi iste’molchilari uchun yangi billing dasturi joriy qilinganligi sababli penya hisoblash tartibi dasturchilar tomonidan ishlab chiqilmoqda”, — dedi Akmal Murodov.
Izoh (0)