O‘zbekiston Energetika vazirligi davlat kompaniyalarida amalga oshirilgan tayinlovlar “O‘zbekneftgaz”, UzGasTrade va “Issiqlik elektr stansiyalari” kompaniyalariga yangi rahbarlar tayinlanganini maʼlum qildi.
Jo‘rayev Bahodir Ibragimovich — “Issiqlik elektr stansiyalari” AJ boshqaruvi raisi etib tayinlandi. Jo‘rayev bunga qadar “Issiqlik elektr stansiyalari” AJ boshqaruvi raisi vazifasini bajaruvchi sifatida faoliyat yuritib kelayotgandi.
Isaqulov Sardor Dadajonovich — “Issiqlik elektr stansiyalari” AJ boshqaruvi raisining birinchi o‘rinbosari lavozimiga tayinlandi. Isaqulov bunga qadar Energetika vazirligining Markaziy dispetcherlik boshqarmasi boshlig‘i lavozimida faoliyat yuritgan.
Navbatdagi tayinlov, Sidiqov Bahodirjon Bahromovich — “O‘zbekneftgaz” AJ boshqaruvi raisi etib tayinlandi. Sidiqov bunga qadar “O‘zbekneftgaz” boshqaruvi raisi vazifasini bajaruvchi sifatida faoliyat yuritib kelayotgandi.
Sidiqov 2017-2018-yillarda mazkur kompaniyada rais o‘rinbosari, 2019-fevralidan 2020-yil yanvarigacha kompaniya raisi sifatida ishlagan. “O‘zbekneftgaz”ga qaytishidan oldin Olmalik kon-metallurgiya kombinati “Yoshlik” konini o‘zlashtirish bo‘yicha loyiha ofisi rahbari lavozimida faoliyat yuritgan.
Shu bilan birga, "Sherov Rustam Cho‘liyevich “O‘zbekneftgaz” AJ Boshqaruvi raisining Geologiya va qazib chiqarish bo‘yicha o‘rinbosari lavozimiga tayinlandi. Sherov shu kungacha “O‘zbekneftgaz” AJ boshqaruvi raisining Qazib chiqarish va qayta ishlash bo‘yicha o‘rinbosari lavozimida ishlagan.
Shuningfek, Temirov Odil Shukurovich “O‘zbekneftgaz” AJ boshqaruvi raisining Qayta ishlash bo‘yicha o‘rinbosari lavozimiga tayinlandi. Tayinlovga qadar u “O‘zkimyosanoat” AJ Boshqaruv raisining ishlab chiqarish, mahalliylashtirish, sanoatda kooperatsiya aloqalarini kengaytirish va axborot texnologiyalari bo‘yicha birinchi o‘rinbosari lavozimida ishlagan.
Agzamov Alisher Tohirovich — UzGasTrade AJ boshqaruvi raisi lavozimiga tayinlandi. Agzamov bunga qadar UzGasTrade AJ Tabiiy gazni xarid qilish boshqarmasi boshlig‘i lavozimida faoliyat yuritib kelayotgan edi.
Bugun, 4-iyul kuni “O‘zbekneftgaz” AJ bergan rasmiy xabarga ko‘ra, kompaniya matbuot xizmatiga yangi rahbar tayinlangan.
Ibodov Mo‘min Mamurjonovich “O‘zbekneftgaz” AJ boshqaruv raisining axborot siyosati masalalari bo‘yicha maslahatchisi – matbuot kotibi vazifasini bajaruvchi etib tayinlandi.
Tayinlovga qadar Ibodov Prezident administratsiyasi, Oliy Majlis Senati, Davlat aktivlarini boshqarish agentligi, Oliy va o‘rta maxsus taʼlim vazirligida axborot siyosati masalalari bo‘yicha faoliyat olib borgan.
Izoh (0)