Юридик истеъмолчилар томонидан ичимлик суви бўйича қарздорлик қоида ва шартномада белгиланган муддатда тўланмаган тақдирда пеня тартиби жорий қилинган бўлиб, 2023 йилнинг 1 май санасидан бошлаб пеня ҳисоблаш тартиби бошланган. Бу ҳақда “Ўзсувтаъминот” АЖ ахборот хизмати раҳбари Акмал Муродов “Дарё”га маълум қилди.
Акмал Муродовнинг айтишича, қоидага кўра, барча гуруҳ истеъмолчилари ичимлик сув таъминоти ва сув чиқариш хизмати учун ҳисобга олиш приборлари мавжуд бўлганда охирги уч ойнинг ўртача сарфи бўйича ҳақ тўлайди.
“Ҳисобга олиш приборлари мавжуд бўлмаганда ойлик истеъмол нормаси бўйича кейинги ой учун ҳар ойнинг 10-санасига қадар 100 фоиз олдиндан ҳақ тўлашни амалга оширишлари лозим. Тўловнинг шартномада белгилангандан кечиктирилган ҳар бир куни учун — юридик шахслар 0,4 фоиз, жисмоний шахслар эса 0,1 фоиз пеня тўланиши кўрсатиб ўтилган. Аммо бу кўрсаткич жами кечиктирилган сумманинг 50 фоизидан ошмаслиги лозим”, — деди “Ўзсувтаъминот” масъул ходими.
Унинг таъкидлашича, юридик истеъмолчилар белгиланган муддатда тўланмаган тақдирда пеня ҳисоблаш тартиби жорий қилинган.
“Мазкур тартиб 2023 йилнинг 1 май санасидан бошлаб истеъмолчиларга пеня ҳисоблаш тартиби бошланган. Аҳоли истеъмолчилари учун янги биллинг дастури жорий қилинганлиги сабабли пеня ҳисоблаш тартиби дастурчилар томонидан ишлаб чиқилмоқда”, — деди Акмал Муродов.
Изоҳ (0)