“Kompromatuzb иши” суд муҳокамасига юборилгани ҳақида хабар берилган эди. Олий суд матбуот котиби ушбу Telegram канал билан боғлиқ жиноят иши юзасидан маълумот берди.
Унга кўра, ушбу жиноят иши жиноят ишлари бўйича Шайхонтоҳур туман судининг иш юритувига келиб тушган бўлиб, айни пайтда “E-ХSUD” электрон ахборот тизими орқали судьялар ўртасида тақсимланиш жараёнидадир.
Тасдиқланган айблов хулосасига кўра мазкур жиноят иши бўйича 19 нафар жабрланувчи ва 10 нафар фуқаровий даъвогар мавжуд бўлиб, жиноят оқибатида уларга жами 5 миллиард 138 миллион сўм миқдорида моддий зарар етказилгани аниқланган.
Бош прокуратура томонидан тасдиқланган айблов хулосасига кўра, 4 нафар шахс — “Human.uz” сайти асосчиси ва муҳаррири Хуршид Далиев, Меҳнат муносабатлари ва бандлик вазирлиги матбуот котиби Мавжуда Мирзаева, “Ўзбекнефтгаз” АЖ матбуот котиби Сиёвуш Ҳошимов ва фуқаро Аҳмадулло Аҳмаджонов Жиноят кодексининг 165-моддаси 3-қисми (товламачилик) ва 243-моддаси (жиноий фаолиятдан олинган даромадларни легаллаштириш) билан айбланмоқда.
Маълумот учун, Жиноят кодексининг 165-моддаси (товламачилик) 3-қисми — 10 йилдан 15 йилгача озодликдан маҳрум қилиш билан жазоланади. Жиноят кодексининг 243-моддаси Жиноий фаолиятдан олинган даромадларни легаллаштириш — Жиноий фаолиятдан олинган даромадларни легаллаштириш, яъни мулк (пул маблағлари ёки бошқа мол-мулк) жиноий фаолият натижасида топилган бўлса, уни ўтказиш, мулкка айлантириш ёхуд алмаштириш йўли билан унинг келиб чиқишига қонуний тус бериш, худди шунингдек бундай пул маблағлари ёки бошқа мол-мулкнинг асл хусусиятини, манбаини, турган жойини, тасарруф этиш, кўчириш усулини, пул маблағларига ёки бошқа мол-мулкка бўлган ҳақиқий эгалик ҳуқуқларини ёки унинг кимга қарашлилигини яшириш ёхуд сир сақлаш, — 5 йилдан 10 йилгача озодликдан маҳрум қилиш билан жазоланади.
Изоҳ (0)