Yaponiyada tinimsiz yog‘ayotgan yomg‘irlar fonida mamlakat janubidagi Kyusyu viloyati hukumati hududlardagi aholini evakuatsiya qilish haqida ogohlantirdi. Bu haqda 3-iyul, dushanba kuni ertalab Yaponiyaning NHK telekanali o‘z saytida ma’lum qildi.
Kumamoto, Fukuoka, Oita, Miyadzaki, Saga va Yamaguti prefekturalarida ko‘chki xavfi nihoyatda yuqori darajaga ko‘tarildi, deyiladi xabarda. Fransiyaning AFP agentligi ehtimoliy evakuatsiya haqidagi ogohlantirish Yaponiya g‘arbidagi ikki millionga yaqin odamga ta’sir qilgani haqida xabar bergan edi.
Xususan, Fukuoka janubi-g‘arbiy prefekturasidagi Kurume shahrida 115 mingga yaqin odam, Kumamoto prefekturasining shu nomdagi shahrida 360 ming kishi tegishli buyruqni olgan.
Infratuzilmaning shikastlanishi
Ob-havo sharoiti tufayli bir qator hududlarda infratuzilma shikastlangan. Yaponiya g‘arbidagi Yamaguti prefekturasida kuchli yomg‘ir tufayli temiryo‘l aloqasi uzildi, Mine shahrida Akagava daryosi orqali o‘tuvchi temiryo‘l ko‘prigi qulab tushdi.
Yaponiyaning janubi-g‘arbida har yili yozda kuchli yomg‘ir yog‘adi, bu esa daryolar toshqini, hududlarni suv bosish, ko‘chkilar va odamlarning qurbon bo‘lishiga olib keladi. Tokiodagi Milliy meteorologiya xizmati kuchli yomg‘ir 4-iyul kuni ham davom etishi haqida ogohlantirmoqda.
Izoh (0)