Caminando Fronteras inson huquqlari tashkilotining ma’lum qilishicha, Kanar orollari yaqinida kema cho‘kib ketishi oqibatida bortdagi 51 muhojir halok bo‘ldi. Bu haqda faol Elena Maleno Twitter’da yozdi.
Qayd etilishicha, kema Marokashning Tan-Tan shahridan Ispaniyaning Kanar orollariga qarab yo‘lga chiqqan. Dengizda sakkiz kun suzgan.
“Kanar yo‘nalishidagi halokat 51 kishining, jumladan 11 ayol va 3 bolaning o‘limiga olib keldi”, — deb yozgan Maleno 2-iyul kuni kechqurun. Uning versiyasiga ko‘ra, to‘rt muhojir tirik qolgan, ular kasalxonaga yotqizilgan.
Ispaniya Ichki ishlar vazirligi maʼlumotlariga ko‘ra, 2023-yilning yanvaridan mayigacha Kanar orollariga 4,4 mingdan ortiq noqonuniy muhojirlar kirib kelgan. Bu 2022-yilning shu davriga nisbatan deyarli 47 foizga kam.
14-iyun kuni Gretsiya qirg‘oqlarida shimoliy afrikalik muhojirlar o‘tirgan baliqchi qayiq ag‘darilib ketgandi. 100 dan ortiq odam qutqarib olindi. Qayiq bortida 700 nafargacha odam bo‘lgani taxmin qilinmoqda. Qolganlarni tirik topishga umid yo‘q ekani aytildi.
Qayiq taxminan 10-iyun kuni Liviyadan Italiyaga yo‘lga chiqqan. U Pilos shahri yaqinidagi xalqaro suvlarda cho‘kib ketgan. Rasmiylarning fikricha, hodisaga kemaning haddan ziyod ko‘p odamni olib ketayotgani sabab bo‘lgan.
Gretsiya hukumati uch kunlik motam e’lon qildi.
Izoh (0)