Parijda politsiyachi tomonidan otib o‘ldirilgan 17 yoshli o‘smirning o‘limidan so‘ng Fransiyani qamrab olgan tartibsizliklar Shveysariyaga yetib bordi, deb xabar bermoqda AFP. Ijtimoiy tarmoqlardagi chaqiriqlardan so‘ng 2-iyulga o‘tar kechasi Lozanna markazida yuzdan ortiq o‘smir va yoshlar yig‘ilgan – ular deraza oynalarini sindirib, politsiyachilarga tosh otgan. Shveysariya politsiyasi ma’lumotlariga ko‘ra, 7 kishi, jumladan, 6 nafar voyaga yetmaganlar qo‘lga olindi. Jabrlanganlar haqida xabar berilmagan.
3-iyul kuni Fransiya prezidenti Emmanuel Makron Fransiya parlamenti deputatlari va tartibsizliklardan jabr ko‘rgan 220 ta shahar va kommuna merlari bilan uchrashishni rejalashtirgan. Mamlakatdagi vaziyat tufayli u Germaniyaga belgilangan tashrifini qoldirdi.
Fransiyadagi namoyishlarga politsiyachi otib o‘ldirgan 17 yoshli o‘smirning o‘limi sabab bo‘ldi. Rasmiy ma’lumotlarga ko‘ra, yigit mashinada ketayotib, politsiyachining talabiga binoan to‘xtashdan bosh tortgan, shuning uchun unga qarata o‘t ochilgan. Huquq-tartibot idoralari voqeaning barcha holatlarini aniqlash uchun tergov boshladi. O‘smirni otgan politsiyachi hibsga olingan. U qasddan odam o‘ldirishda ayblandi.
Tartibsizliklar bilan bog‘liq holda kuniga yuzlab kishilar hibsga olindi — birgina yakshanbaga o‘tar kechasi kamida 719 kishi qo‘lga olingan. Shu bilan birga, ommaviy axborot vositalari o‘ldirilgan yigitning dafn marosimi tinch o‘tgani haqida yozdi.
Otib o‘ldirilgan o‘smirning buvisi namoyishlarni to‘xtatishga chaqirdi.
“Biz do‘konlar, avtobuslar va maktablarni vayron qilishlarini xohlamaymiz. Biz hamma tinchlanishini istaymiz”, — dedi ayol.
Fransiyadagi tartibsizliklar fonida barcha madaniy tadbirlar bekor qilingan va jamoat transporti to‘xtatilgan, namoyishchilarga qarshi kurashga 45 ming politsiyachi jalb qilingan. Biroq Parijda favqulodda holat joriy etish rejalashtirilmagan.
Izoh (0)