“Қўй гўштининг бир килосини 90-100 минг сўмга баҳолаб сотяпмиз” —  Тошкент шаҳридаги қўй бозоридан репортаж (видео)

Бутун дунёда бўлгани каби Ўзбекистонда ҳам Қурбон ҳайити учун жонлиқ сўйилиб, қурбонлик қилинади. Шу кунлар арафасида бозорларда қўй ва молларга талаб ортади.

“Дарё” мухбири Тошкент шаҳрида сотилаётган қўйлар нархи бўйича репортаж тайёрлади.

Чорвадор Зиёдулла Муҳаммаджоновнинг айтишича, ҳар йили Қурбон ҳайити учун уйида бир нечта қўйни 1-1,5 йил боқиб сотгани олиб чиқади.

“Бир кило гўшт 85-95 минг сўмдан ҳисоблаб сотиляпти. Хоҳлаганлар қўйни тириклайин тарозига қўйиб, қанча чиқса ундан 40 фоизини чиқариб ташлаб, 60 фоизини килога чақиб, сотиб олади. Яна кимлардир шу туришида тахминан килога чамалаб харид қилади”, — деди у.

Бозордагиларнинг айтишича, емиш нархлари ошгани учун бу йил қўйларнинг нархи ҳам бир оз қимматлаган.

“Ўртача, энг кўп сотиладиган 30-35 килолик қўйлар 3-3,5 миллион сўм атрофида сотиляпти. Нисбатан катта қўйлар камроқ кетади. Оддий кунларда бир кило гўшт 78-80 минг сўмгача ҳисобланса, Қурбон ҳайити арафасида 100 минг сўмгача чиқиб кетди”, — деди олибсотарлардан бири.

Бозорга ҳар йили қўй боқиб олиб чиқадиган Суннатилла Валиевнинг айтишича, қўйга буғдой, арпа ва нон бериб боқади.

“Тахминан 60 килолик қўйларимиз 5-5,5 миллион сўм, улардан сал кичикроғи 40 килолик қўйлар 4-4,5 миллион сўм бўляпти”, — деди Суннатилла Валиев.

Қашқадарё вилоятининг Чироқчи туманидан пойтахтга қўй олиб келиб сотиш билан шуғулланадиган йигитнинг айтишича, қўйларнинг бир кило гўшти 90-100 минг сўмдан ҳисоблаб сотиляпти.

“Қўйларимиз Қашқадарё ва Сурхондарё тоғларида юриб семирган. Энг катта 65-70 килолик қўйларимизга 7 миллион сўм баҳо айтяпмиз, ками бор. Ўтган йили бир кило кўштни 80 минг сўм атрофида ҳисоблаб сотган эдик”, — деди чироқчилик йигит.

Яна бир сотувчининг айтишича, бу йил харидорлар аввалги йилларга қараганда қўйларни кўп сотиб олаётгани йўқ.