Суриялик фаолларнинг хабар беришича, мамлакат шимоли-ғарбида жангарилар назорати остидаги Идлиб вилоятига Россия авиазарбалари оқибатида камида 13 киши ҳалок бўлди, улар орасида болалар ҳам бор. Ҳаво ҳужумларидан бири Жиср аш-Шугур шаҳридаги гавжум бозорга уюштирилган, бунинг оқибатида камида 9 киши, жумладан, икки бола ҳалок бўлган, деб маълум қилди Сурия Инсон ҳуқуқлари обсерваторияси (SOHR).
Идлиб чеккасига уюштирилган ҳужумда яна тўрт киши ҳалок бўлган, жумладан, ўлганлар орасида жиҳодчи жангари ҳам бор, дейди SOHR. Россия ҳаво рейдларида, шунингдек, 30 киши жароҳатланган. Қурбонлар сони ортиши кутилмоқда.
Асоси Буюк Британияда жойлашган SOHR Суриядаги фаоллар тармоғига таяниб, маълум қилишича, ушбу ҳодиса йил бошидан бери энг қонли авиазарба бўлган.
Жиср аш-Шугур шаҳар фуқаролик мудофааси вакили Аҳмад Жасигининг AFP ахборот агентлигига айтишича, зарар кўрган бозор қишлоқ хўжалиги билан шуғулланувчи маҳаллий аҳоли учун муҳим даромад манбаи эди.
AFP маълумотларига кўра, Сурияда 2011 йилдан бери давом этаётган жанговар ҳаракатлар оқибатида 500 мингга яқин одам ҳалок бўлган, мамлакат аҳолисининг ярмига яқини уйларини ташлаб кетган.
Изоҳ (0)