Joriy yilning 23-iyun kuni Transport vaziri Ilxom Maxkamov Qatar davlatining O‘zbekistondagi Favqulodda va Muxtor elchisi Hasan Hamza Asad Muhammad Hoshim bilan uchrashdi.
Uchrashuvda tomonlar ikki mamlakat o‘rtasida muntazam aviaqatnovlarni yo‘lga qo‘yish masalasini muhokama qilishdi.
Elchi janoblari Qatar Airways aviakompaniyasi Doxa—Toshkent—Doxa yo‘nalishida aviaqatnovlarni amalga oshirish bo‘yicha kompaniya ichki tartiblarini ishlab chiqayotganini ma’lum qildi.
Tomonlar ushbu jarayonlar yakunlangach, parvozlarni amalga oshirish bo‘yicha mavjud talab va qoidalar yuzasidan muzokaralar o‘tkazishga kelishib oldi.
Joriy yilning 8-may kuni Toshkentda ikki davlat hukumatlari, diplomatik korpus va jamoatchilik vakillari ishtirokida Qatar elchixonasining ochilish marosimi bo‘lib o‘tgandi.
“Shubhasiz, Qatarning O‘zbekistondagi diplomatik vakolatxonasi faoliyatining yo‘lga qo‘yilishi munosabatlarimizni sifat jihatidan yangi bosqichga olib chiqish, o‘zaro manfaatli hamkorlik ufqlarini kengaytirish, savdo va investitsiyaviy sohalarni, shuningdek, xalqlarimiz o‘rtasidagi aloqalarni jadallashtirishga xizmat qiladi”, — deb fikr bildirgandi O‘zbekiston tashqi ishlar vaziri Baxtiyor Saidov.
Izoh (0)