Namangan hokimi Tojikistonda So‘g‘d viloyati raisi bilan muzokaralar olib bordi

Namangan viloyati hokimi Shavkat Abdurazzoqov boshchiligidagi delegatsiya Tojikistonning So‘g‘d viloyatiga keldi. Bu haqda “Daryo” muxbiri Azizbek Abduvaliyev xabar bermoqda.

Xo‘jandda Abdurazzoqovning Sug‘d viloyati raisi Rajabboy Ahmadzoda bilan muzokaralari bo‘lib o‘tdi. Muloqot davomida ikki qo‘shni viloyat o‘rtasida ijtimoiy-iqtisodiy, savdo-sotiq, turizm va madaniyat sohalarida hamkorlikni yanada rivojlantirish bo‘yicha bo‘yicha “Yo‘l xaritasi” imzolandi.

Namangan viloyati delegatsiyasi Xo‘jand davlat teatrida o‘tkazilgan “Savdo va investitsiya imkoniyatlari — hamkorlik istiqbollari” mavzusidagi xalqaro forumda ishtirok etdi. Ushbu forumda Shavkat Abdurazzoqov ham so‘zga chiqdi.

Uning qayd etishicha, viloyatda Tojikiston bilan hamkorlikda 10 ta qo‘shma korxona faoliyat ko‘rsatmoqda. O‘zaro tovar ayirboshlash hajmi esa 7 million dollardan ortiqni tashkil etib, 2016-yilga nisbatan 30 barobarga oshgan.

Shavkat Abdurazzaqov tojikistonlik tadbirkorlarni 1 200 gektar maydonda tashkil etilayotgan Yangi Namangan shaharchasi, viloyatdagi 2 ta erkin iqtisodiy va 73 ta kichik sanoat zonalarida biznes loyihalarini amalga oshirishga chaqirdi.

Namangan viloyati delegatsiyasi anʼanaviy “Sug‘d — 2023” xalqaro savdo yarmarkasida ham bo‘lib, bu yerda mahalliy korxonalar, tadbirkorlar tomonidan ishlab chiqarilgan mahsulotlar va milliy hunarmandlik namunalari bilan tanishdi. O‘zaro hamkorlikni yo‘lga qo‘yish bo‘yicha yuzma-yuz uchrashuvlar o‘tkazildi.