“Xorijda vafot etgan yurtdoshlarimizni O‘zbekistonga olib kelish davlat tomonidan ta’minlanadi” — Shavkat Mirziyoyev

Prezidentlikka nomzod Shavkat Mirziyoyev chyet eldagi o’zbekistonliklar huquq va manfaatlarini himoya qilish kafolatlari yanada kuchaytirilishini aytdi.

Xususan, og‘ir ahvolga tushib qolgan barcha o’zbekistonliklarga xorijiy davlatning o‘zida moddiy yordam imkoniyatlari yanada kengaytiriladi. Jumladan, ularga vaqtincha yashash, hujjatlarini tiklash, ona Vataniga qaytish kabi xarajatlari to‘liq qoplab beriladi.

“Taqdir taqozosi bilan xorijda vafot etgan yurtdoshlarimizni o‘z yurtiga olib kelish davlat tomonidan ta’minlanadi. Ularning qaramog‘ida bo‘lgan oila a’zolariga alohida g‘amxo‘rlik qilinadi, farzandlarini o‘qitish va kasb-hunarga o‘rgatish bo‘yicha har tomonlama yordam ko‘rsatiladi.

Bundan tashqari, xorijda ishlayotgan odamlarimizning huquqlarini himoya qilish maqsadida, ularga advokat jalb etish xarajatlarini qoplash va huquqiy yordam berish tizimi yo‘lga qo‘yiladi”, – dedi nomzod.

Shuningdek, AQSH, Kanada, Buyuk Britaniya, Yaponiya va Yevropa davlatlaridan yuqori maosh to‘lanadigan ish topib ketayotgan yurtdoshlarimizga yo‘l chiptasi va “ishchi viza”ni olish xarajatlari to‘liq qoplab beriladi.

Bundan tashqari, chet eldagi o’zbekistonliklar uchun:

• onlayn hujjat olish va boshqa davlat xizmatlarini ko‘rsatish imkoniyatlari yaratiladi, ularning narxlari ichki tariflarga tenglashtiriladi;
• doimiy konsullik hisobida turish badali bekor qilinadi, hisobda turish shartlari soddalashadi;
• sog‘lig‘i va hayotini sug‘urtalash ko‘lami kengaytiriladi. Bunda, “ijtimoiy reyestr” va “3 ta daftar”larga kirgan shaxslarga sug‘urta xarajatlari uchun subsidiya beriladi;
• Germaniya, Yaponiya, Birlashgan Arab Amirliklari va boshqa davlatlarda, shuningdek, Rossiyaning yirik shaharlarida bepul huquqiy, moddiy va ijtimoiy yordam ko‘rsatadigan markazlar ochiladi;
• xorijdagi o’zbekistonliklarni barcha masalalarini tezkorlik bilan hal qilish uchun elchixonalar, Tashqi ishlar, Bandlik va Ichki ishlar vazirliklarida tunu-kun ishlaydigan “koll-markazlar” tashkil etiladi.

“Umuman, xorijdagi vatandoshlarimiz bilan ishlash, chet elga ishlashga va o‘qishga ketgan odamlarimizni ijtimoiy, huquqiy va moddiy qo‘llab-quvvatlash tadbirlariga kelgusi yillarda 200 million dollar yo‘naltiriladi”, – dedi nomzod.