“Хорижда вафот этган юртдошларимизни Ўзбекистонга олиб келиш давлат томонидан таъминланади” — Шавкат Мирзиёев

Президентликка номзод Шавкат Мирзиёев чет элдаги ўзбекистонликлар ҳуқуқ ва манфаатларини ҳимоя қилиш кафолатлари янада кучайтирилишини айтди.

Хусусан, оғир аҳволга тушиб қолган барча ўзбекистонликларга хорижий давлатнинг ўзида моддий ёрдам имкониятлари янада кенгайтирилади. Жумладан, уларга вақтинча яшаш, ҳужжатларини тиклаш, она Ватанига қайтиш каби харажатлари тўлиқ қоплаб берилади.

“Тақдир тақозоси билан хорижда вафот этган юртдошларимизни ўз юртига олиб келиш давлат томонидан таъминланади. Уларнинг қарамоғида бўлган оила аъзоларига алоҳида ғамхўрлик қилинади, фарзандларини ўқитиш ва касб-ҳунарга ўргатиш бўйича ҳар томонлама ёрдам кўрсатилади.

Бундан ташқари, хорижда ишлаётган одамларимизнинг ҳуқуқларини ҳимоя қилиш мақсадида, уларга адвокат жалб этиш харажатларини қоплаш ва ҳуқуқий ёрдам бериш тизими йўлга қўйилади”, – деди номзод.

Шунингдек, АҚШ, Канада, Буюк Британия, Япония ва Европа давлатларидан юқори маош тўланадиган иш топиб кетаётган юртдошларимизга йўл чиптаси ва “ишчи виза”ни олиш харажатлари тўлиқ қоплаб берилади.

Бундан ташқари, чет элдаги ўзбекистонликлар учун:

• онлайн ҳужжат олиш ва бошқа давлат хизматларини кўрсатиш имкониятлари яратилади, уларнинг нархлари ички тарифларга тенглаштирилади;
• доимий консуллик ҳисобида туриш бадали бекор қилинади, ҳисобда туриш шартлари соддалашади;
• соғлиғи ва ҳаётини суғурталаш кўлами кенгайтирилади. Бунда, “ижтимоий реестр” ва “3 та дафтар”ларга кирган шахсларга суғурта харажатлари учун субсидия берилади;
• Германия, Япония, Бирлашган Араб Амирликлари ва бошқа давлатларда, шунингдек, Россиянинг йирик шаҳарларида бепул ҳуқуқий, моддий ва ижтимоий ёрдам кўрсатадиган марказлар очилади;
• хориждаги ўзбекистонликларни барча масалаларини тезкорлик билан ҳал қилиш учун элчихоналар, Ташқи ишлар, Бандлик ва Ички ишлар вазирликларида туну-кун ишлайдиган “колл-марказлар” ташкил этилади.

“Умуман, хориждаги ватандошларимиз билан ишлаш, чет элга ишлашга ва ўқишга кетган одамларимизни ижтимоий, ҳуқуқий ва моддий қўллаб-қувватлаш тадбирларига келгуси йилларда 200 миллион доллар йўналтирилади”, – деди номзод.