Qashqadaryoda xavfsizligi taʼminlanmagan transformator sabab 7 yoshli bola ikki qo‘lidan ajralib qoldi (foto)

Qashqadaryo viloyatining Qarshi tumanida xavfsizligi taʼminlanmagan transformator sabab 7 yoshli bola ikki qo‘lidan ajralib qoldi. Bu haqda “Daryo”ga uning otasi Sherzod O‘roqov xabar berdi.

Maʼlum bo‘lishicha, voqea 2023-yilning 22-fevral kuni sodir bo‘lgan.

“O‘g‘lim o‘sha kuni transformatorning ochiq joyidan ichkariga asalarining uyasini ko‘rib, asal olish maqsadida kirgan. Va chiqib ketayotgan paytda qo‘li tokka tegib ketgan. Oqibatda tok urib, o‘g‘lim pastga chuqurga tushib ketgan. Yaxshi odamlar o‘g‘limni chuqurning ichidan tortib olishganini aytdi”, — deydi bolaning otasi Sherzod O‘roqov.

Murojaatchi otaning aytishicha, shu voqeadan so‘ng o‘g‘li 10 kun shifoxonada davolangach, o‘ziga kelgan.

“Allohga shukurki, o‘g‘lim omon qolgan. Lekin bugungi kunga kelib, o‘g‘limning ikki qo‘li tirsagigacha kesib tashlangan. Hech qanday ish qilolmaydi. O‘zimiz ovqatlantiramiz, o‘zimiz kiyintiramiz. Hatto hojatxonaga ham o‘zimiz olib borib, o‘zimiz olib qaytamiz. Masʼullarga murojaat qilib, protez qo‘l qo‘yilishida yordam so‘rasam, omon qolganiga shukr qiling deyishadi. Nima uchun xavfsizligi taʼminlanmagan transformator uchun mening o‘g‘lim yuz foiz aybdor bo‘lishi kerak”, — deydi ota.

Sherzod O‘roqov 3 million so‘m maosh evaziga qishloq xo‘jaligi bilan shug‘ullanuvchi korxonada traktorchi bo‘lib ishlashini, o‘g‘lining kelajagi uchun protez qo‘l qo‘ydirishga qurbi yetmayotganini aytmoqda.

“Men barcha tashkilotlarga murojaat qilib, o‘g‘limning kelajagi uchun yordam berishlarini so‘radim. O‘g‘lim ertaga ishlashi uchun, hech bo‘lmasa o‘zining yumushlarini bajarishi uchun unga protez qo‘l qo‘yib berilishi kerak. Narxlari bilan qiziqdim, shaxsan men uchun juda qimmat. Transformatorni shu holatga tashlab qo‘yib, o‘g‘limning mudhish voqeaga duchor bo‘lishiga sababchi bo‘lganlar javobgarlikka ham tortilishi lozim”, — deydi Sherzod O‘roqov.

Xavfsizligi taʼminlanmagan transformator sabab qo‘llaridan ayrilgan Alisher Qo‘shshayev ayni paytda 8 yoshda.

Bolaning otasiga ko‘ra, takshilotlarga qilingan murojaatlardan natija yo‘q. Barcha bolaning o‘zini ayblash bilan ovora. Ammo unga yordam berish masalasi hech kimning xayoliga ham kelmayapti.