Rossiyada Chevrolet Spark avtomobili sotila boshlagani to‘g‘risida xabarlar tarqaldi. UzAutoMotors vakili bunday rusumdagi mashinalar eksport qilinmayotganini maʼlum qildi.
“Autonews.ru” sayti Chevrolet Spark avtomobili Rossiyada sotilayotgani haqida xabar tarqatdi. Manbaga ko‘ra, mamlakatda mazkur rusumdagi mashinalar 1 million 219 ming rublga sotila boshlagan.
“O‘tgan yili ishlab chiqarilgan avtomobillar Rossiyaga parallel import sxemasi bo‘yicha olib kelingan. Avtomobil narxi 1 million 219 ming rubldan boshlanadi, bu Lada Vesta narxidan arzonroq. Chevrolet Spark avtomobilining uchinchi avlodi O‘zbekistonda UzAuto zavodida 2010-yildan 2023-yil martigacha ishlab chiqarilgan. Rossiyada eng yangi, 2023-yil ishlab chiqarilgan avtomobillar taklif etiladi”, — deyiladi xabarda.
“Daryo” muxbiri holatga oydinlik kiritish maqsadida UzAutoMotors axborot xizmati bilan bog‘landi. Kompaniya vakilining maʼlum qilishicha, hozirda Rossiyaga Spark eksport qilinmayapti.
“Yo‘q, Rossiyaga Spark eksport qilmayapmiz. U yerga parallel import qayerdan bo‘lganini bila olmaymiz. Balki kimdir o‘sha payt avtomobil sotib olib, endi borib Rossiyada sotayotgan bo‘lishi ham mumkin. Bu haqda bizda aniq maʼlumot yo‘q” — dedi manba.
Eslatib o‘tamiz, UzAutoMotors 2022-yil yakunida Spark va Nexia-3 ishlab chiqarish to‘xtatilishini, ushbu avtomobillar o‘rniga Onix va Tracker avtomobillari ishlab chiqarilishi maʼlum qilgandi.
Izoh (0)