Senat 22-iyun kuni o‘tkazilgan qirq ikkinchi yalpi majlisda “Ijro hujjatlarini ijro etmaganlik uchun solinadigan maʼmuriy jarima miqdorini belgilash tartibi takomillashtirilishi munosabati bilan O‘zbekiston Respublikasining Maʼmuriy javobgarlik to‘g‘risidagi kodeksiga o‘zgartirishlar va qo‘shimcha kiritish haqida”gi qonunni ma’qulladi.
Majlisda senatorlar O‘zbekistonda amalga oshirilgan ishlarga qaramasdan, ijro hujjatlarini ijrosini taʼminlashda ayrim kamchiliklar saqlanib qolayotgani, ushbu sohada tegishli o‘zgartirishlar kiritish zarurligini qayd etdi.
Xususan, ijro hujjati bo‘yicha qarzdor undirilishi lozim bo‘lgan qarzdorlikni o‘z vaqtida to‘lamasa, MIB tomonidan qarzdorga nisbatan maʼmuriy jarima qo‘llanilishi, ushbu jarimaning miqdori esa Maʼmuriy javobgarlik to‘g‘risidagi kodeksga ko‘ra fuqarolarga nisbatan 300 ming so‘mdan 1,5 million so‘mgacha, mansabdor shaxslarga nisbatan 1,5 million so‘mdan 3 million so‘mgacha belgilanishi mumkinligi qonunchilik bilan mustahkamlab qo‘yilgan.
Senatorlar, qarzdor tomonidan to‘lanishi lozim bo‘lgan qarzdorlik summasi jarimaning eng kam miqdoridan ham kam bo‘lgan bo‘lsa-da, qarzdorlikka nisbatan yuqori miqdordagi jarima tayinlanishi ijtimoiy adolat prinsiplarining buzilishiga, bu esa qarzdorlarning haqli eʼtirozlariga sabab bo‘layotganiga hamda mazkur holat tabiiy ravishda fuqarolarning to‘lov qobiliyatiga salbiy taʼsir ko‘rsatayotganiga alohida eʼtibor qaratdi.
Qoun bilan Maʼmuriy javobgarlik to‘g‘risidagi kodeksga tegishli o‘zgartishlar kiritilib, bu bartaraf etilmoqda. Xususan, qo‘llaniladigan jarimaning miqdori ijro hujjatida undirilishi belgilangan summadan yuqori bo‘lishi mumkin emasligi haqida norma kiritilmoqda.
Shuningdek, Maʼmuriy javobgarlik to‘g‘risidagi kodeksning 198-1-moddasida nazarda tutilgan maʼmuriy huquqbuzarliklar to‘g‘risidagi ishlarni ko‘rib chiqishga hamda maʼmuriy jazo qo‘llashga endilikda O‘zbekiston bosh davlat ijrochisi, Qoraqalpog‘iston Respublikasi, viloyatlar va Toshkent shahrining bosh davlat ijrochilari, ularning o‘rinbosarlari, shuningdek, MIBning tuman (shahar) bo‘limlari boshliqlari haqli ekani belgilanmoqda.
Ta’kidlanishicha, qonunning qabul qilinishi fuqarolarning huquqlari, erkinliklari va qonuniy manfaatlari ishonchli himoya qilinishiga, ijro hujjatini ijro etmagani uchun qarzdorga nisbatan adolatli jarima tayinlanishiga, MIB tizimida suiisteʼmolchiliklarning hamda korrupsion holatlarning oldi olinishiga, shuningdek, nazorat kuchaytirilishiga xizmat qiladi.
“150 ming so‘m qarzni to‘lamaganlik uchun 300 ming so‘m jarima solish — bu adolatdan emas, albatta. Qolaversa, bunday amaliyot yangi konstitutsiyaviy qoidaga, yaʼni fuqaroga qo‘llaniladigan huquqiy taʼsir chorasi mutanosiblik prinsipiga asoslanishi va yetarli bo‘lishi kerakligi qoidasiga mutlaqo zid. Yoki maʼmuriy jarimalarni MIBning istalgan ijrochisi emas, balki faqat rahbar xodimlari qo‘llashi mumkinligiga oid norma ham eʼtiborga molik deb hisoblaymiz”, — dedi Senat raisi Maʼmuriy javobgarlik to‘g‘risidagi kodeksiga kiritilayotgan o‘zgartirish va qo‘shimchalar borasida.
Izoh (0)