Россияда Chevrolet Spark автомобили сотила бошлагани тўғрисида хабарлар тарқалди. UzAutoMotors вакили бундай русумдаги машиналар экспорт қилинмаётганини маълум қилди.
“Autonews.ру” сайти Chevrolet Spark автомобили Россияда сотилаётгани ҳақида хабар тарқатди. Манбага кўра, мамлакатда мазкур русумдаги машиналар 1 миллион 219 минг рублга сотила бошлаган.
“Ўтган йили ишлаб чиқарилган автомобиллар Россияга параллел импорт схемаси бўйича олиб келинган. Автомобиль нархи 1 миллион 219 минг рублдан бошланади, бу Лада Vesta нархидан арзонроқ. Chevrolet Spark автомобилининг учинчи авлоди Ўзбекистонда UzAuto заводида 2010 йилдан 2023 йил мартигача ишлаб чиқарилган. Россияда энг янги, 2023 йил ишлаб чиқарилган автомобиллар таклиф этилади”, — дейилади хабарда.
“Дарё” мухбири ҳолатга ойдинлик киритиш мақсадида UzAutoMotors ахборот хизмати билан боғланди. Компания вакилининг маълум қилишича, ҳозирда Россияга Spark экспорт қилинмаяпти.
“Йўқ, Россияга Spark экспорт қилмаяпмиз. У ерга параллел импорт қаердан бўлганини била олмаймиз. Балки кимдир ўша пайт автомобиль сотиб олиб, энди бориб Россияда сотаётган бўлиши ҳам мумкин. Бу ҳақда бизда аниқ маълумот йўқ” — деди манба.
Эслатиб ўтамиз, UzAutoMotors 2022 йил якунида Spark ва Nexia-3 ишлаб чиқариш тўхтатилишини, ушбу автомобиллар ўрнига Onix ва Tracker автомобиллари ишлаб чиқарилиши маълум қилганди.
Изоҳ (0)