“Suv bilan bog‘liq muammolar haqida jamoatchilik bong urmoqda, biroq masʼullar jim” — Senat raisi

O‘zbekistonda umumiy suv resurslaridan tejamli foydalanish masalasida bir qator muammolar mavjud. Bu haqda Senat raisi Tanzila Norboyeva bugun (22-iyun) bo‘lib o‘tayotgan parlament yuqori palatasi yalpi majlisida maʼlum qildi.

Tanzila Norboyevaning taʼkidlashicha, O‘zbekistonda suvdan ratsional foydalanishga qaratilgan choralar yetarli emas.

“Suv resurslarining kamayishi va tanqisligi butun dunyoda kuzatilayotgan global muammo. Bundan tegishli xulosalar qilib, suvni tejash va ratsional ishlatishni o‘rganishimiz zarur. Lekin bu yo‘nalishda o‘z yechimini kutayotgan asosiy masala–suvdan foydalanishdagi isrofgarchilik va o‘ylovsiz ishlatilishi masalasi. Kundalik hayotimizda suvni behuda, maqsadsiz isrof qilish holatlariga ko‘p duch kelmoqdamiz. Oxirgi paytlarda suv bilan bog‘liq tizimli muammolar haqida jamoatchilik bong urmoqda. Turli tanqidiy-tahliliy chiqishlar, asosli mulohazalar bildirilmoqda. Biroq masʼullar jim. Suvdan ratsional foydalanishga qaratilgan keng qamrovli chora-tadbirlarni ko‘rmayapmiz” — dedi Senat raisi.

Maʼlum qilinishicha, dunyoning ko‘plab taraqqiy etgan davlatlarida turmush darajasi qanchalik yuqori bo‘lmasin, suvni asrab-avaylashga nihoyatda jiddiy eʼtibor qaratiladi. O‘zbekistonda esa oddiy kundalik ro‘zg‘or darajasidan tortib, yirik davlat tashkilotlarigacha suvdan oqilona foydalanish madaniyati hali to‘liq shakllanmagan. Ayniqsa, katta shaharlarda suvni isrof qilish, tejamaslik holatlari ko‘proq ko‘zga tashlanadi.

“Bunday holatlarga chek qo‘yish maqsadida ishni eng quyidan, yaʼni oilalar va mahallalardan boshlash zarur. Bu borada mutasaddi tuzilmalar, fuqarolar yig‘inlari masʼullari masʼuliyatni jiddiy oshirishlari, odamlarga tushuntirishlari zarur. Suvni isrof qilish holatlariga nisbatan jamoatchilikning faol taʼsir usullaridan ham samarali foydalanish, yaʼni murosasiz jamoatchilik nazoratini ham taʼminlash zarur. Respublika va mahalliy darajadagi barcha rahbarlarning suv resurslarini asrash bo‘yicha masʼuliyati va shaxsiy javobgarligini oshirish choralarini ko‘rish lozim”, — deya taʼkidladi Tanzila Norboyeva.