“Навоийнинг 5 та туман ва шаҳрида “Хамса”даги достонлар номи билан аталадиган бешта экобоғ яратсак, нима дейсизлар?” – Шавкат Мирзиёев

Президентликка номзод Шавкат Мирзиёев навоийлик сайловчилар билан учрашувда келгуси етти йилда аҳолининг турмуш шароитларини яхшилашга оид режалари билан таништирди.

Хусусан, вилоятда 30 минг оилага мўлжалланган 350 та кўп қаватли уйлар барпо этилади. Шунингдек, 45 минг оила истиқомат қиладиган 1 минг 200 та кўп қаватли уйлар таъмирланади.

Бундан ташқари, бу ишларни амалга ошириш учун барча манбалар ҳисобидан Навоий вилоятининг ўзига 1 миллиард доллар йўналтирилади.

Булардан ташқари:

• 3,5 минг километр ички йўллар, 60 дан зиёд кўприклар қурилади ва таъмирланади;
• эскирган 5 минг километр электр тармоқлари ва 1 минг 200 та трансформатор янгиланади;
• 1 минг километр сув тармоқлари ўтказилиши натижасида 100 минг аҳоли илк бор ичимлик суви билан таъминланади ва сув таъминоти даражаси 85 фоизга етади.

Номзод экология тўғрисида гапирар экан, Навоийда экологик вазиятни яхшилаш мақсадида келгуси етти йилда 120 миллион туп дарахт экилишини айтди.

“Буюк бобоколонимиз Навоийга чексиз ҳурматимиз белгиси сифатида, вилоятнинг 5 та туман ва шаҳрида “Хамса”даги достонлар номи билан аталадиган бешта экобоғ ярацак, нима дейсизлар?”, – деди номзод.