San-Fransisko xalqaro aeroportida yangi xodim — Dyuk ismli mushuk paydo bo‘ldi. Uning asosiy vazifasi uchishdan qo‘rqayotgan yo‘lovchilarni tinchlantirishdan iborat, deb xabar bermoqda aeroport matbuot xizmati.
Mushuk musiqachi Dyuk Ellington sharafiga nomlangan. 2010-yilda ko‘ngillilar uni ko‘chadan topib olib, hayvonlar uchun maxsus boshpanaga topshirishgan. Ko‘p o‘tmay, Dyukni besh yoshli qizi bor ayol o‘z uyiga olib ketdi.
Yangi egalari mushukning xotirjam va do‘stona fe’l-atvoriga e’tibor qaratdilar va u “terapevtik“ jonivorga aylanishi mumkinligiga qaror qilishdi.
Maxsus treningdan so‘ng Dyuk turli kasalxonalarda “ishladi”, u yerda bemorlarni tinchlantirdi.
Qizig‘i shundaki, mushuk aeroportga ishga qabul qilingan yagona jonivor emas. Dunyoning turli aeroportlarida uning “hamkasblari” — itlar, quyonlar va hatto cho‘chqa “psixolog” sifatida faoliyat yuritmoqda.
2019-yilda AQSH fuqarosi o‘zi bilan parvozga poni olib ketgani haqida xabar berilgan edi. Uning so‘zlariga ko‘ra, jonivor unga psixologik yordam ko‘rsatgan. Samolyotda g‘ayrioddiy uy hayvonlari bo‘lgan ayolga ruxsat berildi, u yerda poni ko‘pincha tinchgina uxlardi.
Izoh (0)