Улуғбек Рўзиқулов Ўзбекистон гимнастика федерациясининг раиси этиб сайланди. Бу ҳақда Миллий Олимпия қўмитаси матбуот хизмати хабар берди.
Маълум қилинишича, 18 июнь куни Миллий Олимпия қўмитасида Ўзбекистон гимнастика федерациясининг навбатдан ташқари ҳисобот-сайлов конференцияси бўлиб ўтди. Федерациянинг аввалги раҳбари бошқа ишга ўтгани муносабати билан ташкилотга янги раис сайлаш конференция кун тартибидаги асосий масала бўлди.
МОҚ бош котиби Ойбек Қосимов ушбу лавозимга федерация бош ҳомийси “Ўзавтосаноат” АК бошқарув раиси Улуғбек Рўзиқулов номзодини илгари сурди. Конференция қатнашчилари бир овоздан ушбу номзодни қўллаб-қувватлади ва Улуғбек Рўзиқулов Ўзбекистон гимнастика федерацияси раиси этиб сайланди.
2022 йилнинг 22 февралидан буён федерацияни “Ўзавтосаноат”нинг аввалги раҳбари Шавкат Умурзоқов бошқарган. 2023 йил 23 март куни у Тошкент шаҳри ҳокими вазифасини бажарувчи этиб тайинлангач, “Ўзавтосаноат”га Улуғбек Рўзиқулов раҳбар бўлди.
Изоҳ (0)