Ostonadagi bankka qurolli shaxs bostirib kirib, odamlarni garovga oldi, deb xabar bermoqda Tengrinews. Qozog‘iston Ichki ishlar vazirligining aniqlik kiritishicha, erkak qurol bilan Kaspi bankining Do‘stlik ko‘chasidagi filialiga kirib, binoni ichidan zanjirlagan.
Bosqinchi bilan birga binoda bir nechta odam bor. Ular bank xodimlari, deyiladi bank matbuot xizmati xabarida. Keyinroq ijtimoiy tarmoqlarda qurolli erkak garovdagilardan birining chakkasiga to‘pponcha tirab turgani aks etgan surat tarqaldi.
Politsiya bosqinchi bilan muzokaralar olib bormoqda. Mahalliy matbuotning yozishicha, bank joylashgan binoda yashovchilardan o‘z xonadonlarini tark etish so‘ralgan. Binoning o‘zi o‘rab olingan.
Xabarlarga ko‘ra, bank ichida yetti nafar ayol va qo‘riqchi bo‘lib, bosqinchi uch soat ichida barcha bank mablag‘larini nogiron bolalar, kambag‘al va muhtojlar hisobiga o‘tkazishni talab qilgan. Aks holda, barchani otib tashlash bilan tahdid qilgan.
Qozog‘iston Ichki ishlar vazirligi ushbu xabarlarga izoh bermadi.
Keyinroq bosqinchi qo‘lga olingani ma’lum qilindi.
Izoh (0)