Остонадаги банкка қуролли шахс бостириб кириб, одамларни гаровга олди, деб хабар бермоқда Tengrinews. Қозоғистон Ички ишлар вазирлигининг аниқлик киритишича, эркак қурол билан Каспи банкининг Дўстлик кўчасидаги филиалига кириб, бинони ичидан занжирлаган.
Босқинчи билан бирга бинода бир нечта одам бор. Улар банк ходимлари, дейилади банк матбуот хизмати хабарида. Кейинроқ ижтимоий тармоқларда қуролли эркак гаровдагилардан бирининг чаккасига тўппонча тираб тургани акс этган сурат тарқалди.
Полиция босқинчи билан музокаралар олиб бормоқда. Маҳаллий матбуотнинг ёзишича, банк жойлашган бинода яшовчилардан ўз хонадонларини тарк этиш сўралган. Бинонинг ўзи ўраб олинган.
Хабарларга кўра, банк ичида етти нафар аёл ва қўриқчи бўлиб, босқинчи уч соат ичида барча банк маблағларини ногирон болалар, камбағал ва муҳтожлар ҳисобига ўтказишни талаб қилган. Акс ҳолда, барчани отиб ташлаш билан таҳдид қилган.
Қозоғистон Ички ишлар вазирлиги ушбу хабарларга изоҳ бермади.
Кейинроқ босқинчи қўлга олингани маълум қилинди.
Изоҳ (0)