Qozog‘istonning Abay viloyatidagi o‘rmon yong‘inlarida halok bo‘lganlarning oilalariga “Qozog‘iston xalqi” jamg‘armasi mablag‘lari hisobidan 7 million tengedan (15,6 ming dollar), shuningdek, har bir voyaga yetmagan bola uchun 2 million tengedan (4,4 ming dollar) to‘lab beriladi. Bu haqda respublikasi hukumatiga tayanib, Central Asia xabar berdi.
Bunga parallel ravishda qurbonlar va jarohatlanganlarning oilalariga zarur yordam ko‘rsatish uchun alohida jamg‘arma tashkil etilgan.
Qozog‘istonning 40 dan ortiq universitetlari yong‘indan jabr ko‘rgan oilalarning farzandlariga grantlar va yotoqxonadan joy berishga tayyor ekanini bildirgan. Shu bilan birga, to‘lov shartnomasi asosida tahsil olayotgan talabalar va bakalavriat talabalarini grantga o‘tkazish ko‘zda tutilgan.
Qozog‘istondagi o‘rmon yong‘ini
Respublikaning Rossiya bilan chegaradosh Abay viloyatidagi o‘rmon yong‘inlari 8-iyun kuni boshlangan. Yong‘in maydoni 60 ming gektardan oshgan. Ushbu yong‘in oqibatida jami 14 kishi halok bo‘ldi, ular xotirasiga 12-iyun kuni Qozog‘istonda umummilliy motam kuni e’lon qilindi.
Qozog‘iston prezidenti bo‘lib o‘tgan voqea uchun qurbonlarning oilasidan uzr so‘radi va aybdorlar javobgarlikka tortilishini aytdi. U qurbonlarning oilasiga moddiy yordam ko‘rsatilishini bildirdi.
Izoh (0)