Lionel Messining “Inter Mayami”ga o‘tgani Amerika futboliga kutilganidan ko‘proq effekt bermoqda. Argentinalikning Mayamiga o‘tishi MLS’ni o‘zgartirishga ulgurdi, garchi Messi yangi klubi safida birorta o‘yin o‘tkazmagan bo‘lsa ham.
Chinga aylangan hazil
Leo 2018-yilda “Inter Mayami”ning ishga tushirilishi munosabati bilan Devid Bekhemni tabriklagan va videomurojaatida hazil qilgandi: “Balki kelajakda menga qo‘ng‘iroq qilarsan”.
Klub egalari yulduz futbolchilarni jalb qilish g‘oyasidan biror martta voz kechmadi. Messi va Ronalduni bir jamoada o‘ynatish haqida birinchilardan bo‘lib jiddiy gapirgan ham Bekhem edi.
MLS komissari Don Garber 2023-yilning martida liga Messini jalb qilish uchun keraklik harakatlarni amalga oshirishga tayyor ekanini aytdi.
Mavsum yakuniga borib Messining kelajagi haqidagi savollar mavhumligicha qolaverdi. U so‘nggi lahzagacha “Barselona”ga qaytishni xohladi. Saudiya Arabistonidan esa bir necha yuz millionlik takliflar bo‘ldi.
“Inter Mayami” qarorni kutdi, chunki ularning taklifi oldindan tayyorlab qo‘yilgandi. Natijada MLS yutib chiqdi. Devid Bekhemga tegishli klub tirik afsona bilan kelishuvga erishdi.
Pele tajribasi
Amerika ligasi uchun bu haqiqatda juda ulkan qadam. Messining kelishini musobaqa yangi tarixidagi eng muhim voqea sifatida e’tirof etish mumkin. Effekt shubhasiz ulkan bo‘ladi va 1975-yilda “Nyu-York Kosmos”ga o‘tgan Pele bunga yorqin misol.
Braziliyalik afsona tashrifidan keyin “Kosmos” uy o‘yinlarida tomoshabin tashrifi 3,5 mingdan 45 mingga qadar o‘sgandi. Uch marta jamoa 70 mingdan ziyod tomoshabin to‘plagan, bunaqasini o‘sha vaqtlar tasavvur qilish qiyin edi. Pelening tashrifi ligaga Jorj Best, Yoxan Kroyf, Frans Bekkenbauer va Gerd Myuller kabi yulduzlarni jalb qildi.
Ha, keyinchalik bu shov-shuvli transferlarni amalga oshirgan Shimoliy Amerika futbol ligasi (NASL) yo‘q bo‘lib ketdi. Biroq ma’lum vaqtdan keyin uning o‘rnida MLS bo‘y ko‘rsatdi. Bu davrni o‘zgartirish cheki Bekhemga tushgandi. Uning ortidan Zlatan Ibrahimovich va boshqa ko‘plab yulduzlar tashrif buyurdi.
Marketing
Messi — barcha marketologlar orzusidagi futbolchi. AQSHda esa qimmat aktivdan maksimum foyda olishni juda yaxshi bilishadi. “PSJ”dagi holatni eslaymiz: Leo birinchi yili klubga 700 million yevrolik uzoq yillik homiylik shartnomalari keltirdi. Uning ortidan qator nomdor brendlar Parij klubi bilan bitim imzoladi. Sotilgan liboslarning 60 foizi Messi nomi ostida edi va umuman Leo transferidan so‘ng “PSJ” futbolkalari sotuvi 40% o‘sishga erishdi.
Messisi bor “Inter Mayami” katta ehtimol bilan Amerika ligasidagi eng qimmat brendga aylanadi. Natijalar qanday bo‘lishi muhim emas. Muhimi klub allaqachon tijoriy tomondan o‘ziga jalb qiluvchi loyihaga aylandi.
Messi transferidan so‘ng
- Ijtimoiy tarmoqlar
Transfer e’lon qilingan kungacha klub Instagram sahifasida 900 ming obunachi bor edi. Ayni vaqtda esa — 8 million. Hech qaysi MLS klubi bu qadar ko‘p obunachiga ega emas.
Futbolchi ketganidan keyin “PSJ” bir necha kun ichida 2 milliondan ziyod obunachisini yo‘qotdi, katta ehtimol bilan ular Messining yangi klubi sahifasiga obuna bo‘lgan.
- Chiptalar
Messi transferi e’lon qilingandan keyin bir necha soat ichida “Inter Mayami” uy o‘yini uchun chiptaning o‘rtacha narxi 31 dollardan 152 dollarga ko‘tarilgan. Masalan, 25-avgust kuni bo‘lib o‘tadigan “Nyu-York”ka qarshi o‘yin chiptasi 983 dollarga ko‘tarilgan, transferdan oldingi narxdan (99 dollar) 883 foizga ko‘p. 3-sentabrga mo‘ljallangan “Los-Anjeles” bilan o‘yin chiptasi esa 400 foizga ko‘tarilgan — 150 dan 785 dollarga.
Messi yangi jamoasida qachon debyut qilishi noma’lum. OAVga ko‘ra, argentinalik 21-iyul kuni Liga Kubogi doirasidagi Meksikaning “Krus Asul” klubiga qarshi bahsda dastlabki o‘yinini o‘tkazadi. Bu o‘yin chiptasining o‘rtacha narxi 1248 dollarga teng, bu transferdan avvalgi narxdan (o‘rtacha 120 dollar) 10 barobarga ko‘p degani.
- Translyatsiyalar
MLS translyatsiyalarini Apple TV servisi amalga oshiradi. Messining kelishida ushbu servisning ham hissasi bor. Messining “Inter Mayami” bilan shartnomasiga ko‘ra, futbolchi servisning yangi foydalanuvchilari hisobiga ulush oladi. Biroz oldin Apple mavsum oxirigacha bo‘lgan liga o‘yinlari obunasini 99 dollardan 49 dollarga tushirdi va bu auditoriyaning o‘sishini yana-da tezlashtiradi. Kompaniya obunachilar sonini oshkor qilmaydi, biroq Apple mutasaddilarining so‘zlariga ko‘ra, obunachilar va ko‘rishlar soni kutilganidan ancha yaxshi.
Izoh (0)