Аргентина терма жамоаси ҳужумчиси Лионель Месси мамлакат терма жамоасидаги ютуқлари ва фаолияти якунланиб бораётгани ҳақида гапирди. Шунингдек, терма жамоа устози Лионель Скалони Аргентина сардорининг футболдаги муҳим ўрни ҳақида фикр билдирди.
Терма жамоа сафида тўп суриш мен учун улкан шараф. Бу ишни улкан иштиёқ билан амалга оширганман. Ҳа, қийин паллалар ҳам бўлган, шубҳалар пайдо бўлган вақтда терма жамоа сафида ортиқ ўйнамаслигимни ҳам айтгандим. Фикримни ўзгартирганим ва қайтганимдан, шундан кейин муваффақиятга эришганимдан хурсандман, албатта.
Клуб миқёсида ва индивидуал жиҳатдан барчасига эга чиқдим, бироқ терма жамоа сафида бу нарса етишмаётганди ва Аргентинанинг ғалабаси муҳим эканини билардим. Барчасини ютган ҳолда фаолиятимнинг охирига келаётганимдан завқланяпман.
Лионель Месси, футболчи
Аргентина терма жамоаси бош мураббийи Мессини алмаштира оладиган футболчи йўқлигини айтди.
Эртага Мессининг ўрнини ким босади? Ҳеч ким. Мессини ҳеч ким алмаштира олмайди, бироқ Леонинг ўрнини босиб бўлмаслигини англаган ҳолда жамоанинг ўйини ўша-ўша қолишини таъминлашга ҳаракат қиламиз. Терма жамоа бошқа усулларни қўллаган ҳолда шундай яхши ўйин кўрсата олишга қодир.
Футбол олами Месси абадий ўйнашини хоҳлайди, бироқ қайсидир вақт у нафақат Аргентина терма жамоаси, балки футбол билан хайрлашади. Ўша кун барча учун қайғули бўлади.
Лионель Скалони, Аргентина терма жамоаси бош мураббийи
Аввалроқ Месси Қатарда ўтган мундиал унинг учун охиргиси бўлгани ва ЖЧ—2026 да иштирок этмаслигини айтиб ўтганди.
Месси 2022/23 йилги мавсум якунида “ПСЖ”ни эркин агент мақомида тарк этиб, “Интер Майами” билан шартнома имзолади.
Месси Аргентина терма жамоасида...
- Энг кўп ўйин ўтказган футболчи
- Энг яхши тўпурар ва ассистент
- Энг ёши катта гол муаллифи
- ЖЧларда энг кўп ўйин ўтказган футболчи
- ЖЧда энг ёш гол муаллифи
Изоҳ (0)