Microsoft asoschisi Bill Geytsning Reuters agentligiga aytishicha, ilg‘or sun’iy intellekt rivojlanishini to‘xtatishga chaqiriqlar “muammoni hal etmaydi”. U sun’iy intellektni rivojlantirishni olti oyga to‘xtatib turishni taklif qilgan Ilon Mask, Stiv Voznyak va boshqa ekspertlarning ochiq xatiga shunday munosabat bildirdi.
Geytsning so‘zlariga ko‘ra, sun’iy intellekt texnologiyasi insoniyatga foyda keltiradi, shuning uchun Microsoft asoschisi uning rivojlanishini to‘xtatib turish zarur, deb hisoblamaydi. “Shubhasiz, bu (texnologiya) ko‘p foyda keltiradi, biz qiladigan ish — bahsli sohalarni aniqlash”, — dedi tadbirkor.
Geyts ochiq xat mualliflari tomonidan ilgari surilganidek sun’iy intellekt rivojlanishini qanday qilib to‘xtatish mumkinligini tushunmayotganini ta’kidladi. “Men haqiqatan ham tushunmayapman, aynan kim, ularning fikricha, sun’iy intellekt rivojlanishini to‘xtata oladi, barcha mamlakatlar bunga rozi bo‘ladimi, o‘zi umuman nega bunday qilish kerak?” — dedi u.
Bill Geytsning so‘zlariga ko‘ra, bunday yechimni amalga oshirish qiyin, shuning uchun u mutaxassislarga asosiy e’tiborni sun’iy intellekt imkoniyatlari va ulardan qanday qilib eng yaxshi tarzda foydalanish mumkinligiga qaratishni taklif qildi.
Mart oyida Tesla bosh direktori Ilon Mask, Apple asoschilaridan biri Stiv Voznyak va mingdan ortiq ekspertlar umumiy xavfsizlik protokollari joriy etilgunga qadar ilg‘or sun’iy intellektni rivojlantirishni kamida olti oyga to‘xtatib turishga chaqiruvchi ochiq xatni imzolagan edi. Maktub mualliflariga ko‘ra, bu texnologiya insoniyatga xavf tug‘diradi, chunki “kuchli raqamli intellekt”ning hatto yaratuvchilar ham ularni boshqara olmaydi va zamonaviy sun’iy intellekt tizimlari odamlar bilan raqobatlasha boshlaydi.
Maktub chop etilishidan biroz oldin Microsoft tomonidan moliyalashtirilgan Amerika IT-kompaniyasi OpenAI ChatGPT asosini tashkil etuvchi generativ sun’iy intellekt tili modelining yangi versiyasi bo‘lgan GPT-4 ni taqdim etgan.
Izoh (0)