AQSH sudining hakamlar hay’ati Pentagon maxfiy hujjatlarini oshkor qilganlikda gumonlanayotgan 21 yoshli Jek Teysheyraga ayblov qo‘ydi. Bu haqda AQSH Adliya vazirligi saytidagi bayonotda aytiladi.
Teysheyraga milliy mudofaa sirlari ma’lumotlarini qasddan saqlash va uzatishda oltita ayblov e’lon qilindi.
Teysheyra ijtimoiy media platformasi foydalanuvchilari bilan maxfiy ma’lumotlarni, ularga berish mumkin emasligini bila turib, ulashganlikda ayblanmoqda. Bu bilan u AQSH qonunlarini buzgan va milliy xavfsizlikni tahdid ostiga qo‘ygan”, — dedi bosh prokuror Merrik Garland.
Har bir bandda 10 yilgacha ozodlikdan mahrum qilish, uch yilgacha shartli ravishda ozod qilish va 250 ming dollargacha jarima ko‘zda tutilgan.
Teysheyra 13-aprel kuni AQSH maxfiy hujjatlarini e’lon qilishda gumonlanib hibsga olingan edi. Yigit ishlagan AQSH harbiy-havo kuchlari bo‘limi tergov davomida razvedka ishlarini to‘xtatdi.
May oyida The Washington Post gazetasi Teysheyra chet el fuqarolariga maxfiy ma’lumotlarni uzatgan bo‘lishi mumkinligini yozdi. WP maqolasida aytilishicha, Teysheyra maxfiy hujjatlarni Ukrainada urush boshlanganidan beri do‘stlari bilan bo‘lishib kelgan. Yigit jami nechta hujjatni tarqatgani noma’lum. Reuters 50 dan ortiq maxfiy hujjatlarni o‘rgangan, biroq ularning umumiy soni yuzdan ortiq bo‘lishi mumkinligini taxmin qilmoqda.
Izoh (0)