Ijtimoiy tarmoqlarda yuqori ob-havo harorati ta’sirida Toshkent shahrining ayrim hududlariga o‘rnatilgan svetofor qurilmalari faoliyatida nosozliklar kuzatilayotgani haqida xabarlar tarqaldi. “Daryo” shu munosabat bilan Toshkent shahar Ichki ishlar bosh boshqarmasi bilan bog‘lanib, holat yuzasidan izoh oldi.
Unga ko‘ra, ayrim svetoforlar ishlamayotganiga issiq ob-havoning aloqasi yo‘q.
“Svetofor ishlamasligi ob-havo sharoiti bilan bog‘liq emas. Ayrim hududlarda elektr tarmog‘i bilan bog‘liq muammolar bo‘lgani uchun svetofor ishlamasligi holati kuzatilmoqda”, — deydi IIBB axborot xizmati rahbari Nilufar Madiyeva.
Bundan tashqari, tarmoqlarda issiq harorat oqibatida svetofor erib ketgani aks etgan surat tarqalgandi. Nilufar Madiyeva bu surat feyk ekanini aytib, hozirgacha bu bo‘yicha hech qanday murojaat kelib tushmaganini bildirdi.
“Toshkent shahrida svetofor qurilmasi erib tushgani haqida xabar kelib tushmagan. Rasmdagi holat Toshkent shahrida yuz bermagan, bu rasm feyk. Svetofor qurilmasi issiqqa va sovuqqa chidamli materialdan yasalgan”, — deya tushuntirdi u.
Izoh (0)