O‘zbekistonning turli hududlarida yoz fasli kirib kelishi bilan elektr energiyasi ta’minotida tez-tez uzilishlar sodir bo‘lmoqda. Xususan, iyun oyi davomida Toshkent shahrining bir qator hududlari tokdan uzildi. Mas’ullar buni ta’mirlash ishlari olib borilayotgani bilan izohlasa, fuqarolar ob-havo harorati eng pikka chiqqan yoz oylarida elektrning yo‘qligidan norozi.
“Daryo” muxbiri shu munosabat bilan “Hududiy elektr tarmoqlari” AJ Toshkent shahar filiali bosh muhandisi o‘rinbosari Nodir Isroilov bilan intervyu tashkil qilib, ta’minotdagi uzilishlar sabablari haqida so‘radi.
Hozirda podstansiyalar ta’mirlanyapti
“Hozirgi kunda Toshkent shahri aholisini uzluksiz, sifatli elektr energiyasi bilan ta’minlash maqsadida 91-sonli dasturga asosan 903-kilometr tarmoq, 228 ta transformator podstansiyasini yangilash, Mirobod, MIrzo Ulug‘bek, Olmazor, Yunusobod tumanlarida 4 ta 110 kilovoltli podstansiyani rekonstruksiya qilish hamda 5 ta 110 kilovoltli yuqori kuchlanishli podstansiyani ishga tushirish rejalashtirilgan.
Albatta, bu ishlarni olib borishda texnika xavfsizligi jihatdan podstansiyalardan qisqa muddatli o‘chirishlar sodir bo‘lyapti. Hozirda ushbu rekonstruksiya, modernizatsiya ishlari doirasida elektr energiyasida yuzaga kelaytogan uzilishlar qisqa muddatda sodir bo‘ladi. Transformator o‘rnatilishi, yangi tarmoq qurilishi sababli eski xizmat muddatini o‘tab bo‘lgan liniyani o‘chirish, yangi ishga tushirilayotgan tarmoqlarni kabelli liniyasi, havo uzatish elektr tarmog‘i, transformator podstansiyalarini yangilash davrida qisqa muddatli o‘chishlar yuz beradi”.
Xavfsizlik uchun tarmoqni o‘chirishga majburmiz
“Bajariladigan ishlar amalga oshgandan so‘ng iste’molchilarimiz tomonidan kelayotgan e’tirozlar keskin kamayadi. Sababi — quvvat oshadi, tarmoq yangilanadi, elektr uzatish sifati oshadi. Ta’mirlash ishlari jarayonida esa, albatta, o‘chish sodir bo‘ladi. Kuchlanish ostida bo‘lgan har bir tarmoqni o‘chirishga majburmiz. Chunki kapital ta’mirlash davomida ishchilar, texnik xodimlar xavfsizligi nutqai nazaridan ushbu tadbirni amalga oshirishimiz kerak”.
Elektrdagi uzilishlarga avariya sabab bo‘lmadi
“Hurmatli fuqarolar, Toshkent shahrida elektr energiyani uzatishdagi uzilishlarga asosiy sabab avariyaviy holatlar emas, rekonstruksiya ishlari hisoblanadi. Kelgusida bu ishlar amalga oshib, yangi tarmoqlar ishga tushgach, o‘chishlar soni keskin kamayadi.
Zero “qish g‘amini yozda kо‘r” iborasiga amal qilgan holda, ayni kunlarda olib borilayotgan ushbu sa’y-harakatlarimiz ham nafaqat yozning jaziramasi, balki qishning sovuq kunlarida elektr ta’minoti bilan bog‘liq avariyalar sonini kamaytirish, tarmoqlar hamda transformatorlarda vujudga kelishi mumkin bо‘lgan yuklamalarni kamaytirish maqsadida olib borilmoqda.
Hozirgi paytda ushbu dastur doirasida ishlarni tezkorlik bilan bajarish, avariyaviy holatlarini zudlik bilan bartaraf etish uchun Toshkent shahar elektr tarmoqlari va uning 12 ta hududiy fililalida kun-u tun ish rejasi tashkil qilingan. Qisqa muddatlarda ishlar oxiriga yetkazilib, elektr energiya ta’minoti muntazam ravishda ishga tushadi. Yaqin kunlarda normal rejimga qaytib, stabil tarzda elektr yetkazib beramiz”.
Ma’lumotlar sheriklik huquqi asosidan tayyorlandi
Izoh (0)