Farzandini yig‘latib, videoga olgan ayol videolar tarmoqlarda tarqalib ketganidan shikoyat qilib, Andijon viloyat IIBga murojaat qilgan va eriga nisbatan chora ko‘rilishini so‘ragan. Bu haqda viloyat IIB axborot xizmati xabar berdi.
Taʼkidlanishicha, Andijon viloyatining Ulug‘nor tumani “Cho‘lobod” mahallasida yashovchi 21 yoshli ayol 2023-yil 13-iyun kuni yashash uyidan Rossiyada ishlayotgan turmush o‘rtog‘iga oilaviy kelishmovchilik sababli besh oylik farzandini yig‘latgan holdagi videotasvirlarni Telegram messenjeri orqali jo‘natgan.
“Ushbu videoxabarlar ijtimoiy tarmoqlarga tarqalgandan so‘ng, Sh.O. ismli ayol 14-iyun kuni 22:36 da viloyat IIBning 102 xizmatiga qo‘ng‘iroq qilib, unda Telegram messenjeri orqali turmush o‘rtog‘iga farzandi bilan bog‘liq videoxabarlarni jo‘natganligini, biroq turmush o‘rtog‘i ushbu videoxabarlarni ijtimoiy tarmoqlarga tarqatib, obro‘sizlantirayotganligini maʼlum qilgan. Hamda unga nisbatan qonuniy chora ko‘rishni so‘ragan”, — deyiladi rasmiylar izohida.
Qo‘shimcha qilinishicha, ayolning farzandiga nisbatan sudga oid tibbiy ekspertiza tayinlangan. Andijon viloyatining Ulug‘nor tumani IIB tomonidan tergovga qadar tekshiruv o‘tkazilmoqda.
“Ushbu holat bo‘yicha guvohlarning vajlari to‘liq tekshirilib, holatga to‘liq oydinlik kiritilgandan so‘ng, qo‘shimcha ravishda maʼlumot taqdim etiladi”, — deydi masʼullar.
Izoh (0)