Toshkent shahrining Mirzo Ulug‘bek tumanida ikki yoshli bola qulab tushgan xonadon devorlari orasida qolib ketdi. Favqulodda vaziyatlar bo‘limi qutqaruvchilari yordami bilan bola hayoti saqlab qolindi. Bu haqda tuman hokimligi axborot xizmati xabar berdi.
Maʼlum qilinishicha, poytaxtning Mirzo Ulug‘bek tumani “Oliy himmat” mahallasining Neʼmat berk ko‘chasida yashovchi fuqaro o‘zboshimchalik bilan xonadonidan chuqur qazigan.
“Fuqaro o‘zboshimchalik bilan o‘z xonadonidan chuqur (kotlovan) qaziydi va xonadonining bir qismi ag‘darilib tushadi. Devor ag‘darilgan vaqtda xonadonda fuqaroning o‘z farzandi va oila aʼzolari bo‘lgan. Yuzaga kelgan noxush holat sabab ikki yoshli farzandi ag‘darilgan devorlar orasida qolib ketadi”, — deyiladi hokimlik xabarida.
Qo‘shimcha qilinishicha, tuman Favqulodda vaziyatlar bo‘limi xodimlarining saʼyi-harakatlari bilan ikki yoshli bola sog‘-salomat ota-onasiga qaytarilgan.
“Hurmatli fuqarolar o‘zboshimchalik bilan qurilishlarni tashkil etish, chuqur (kotlovan) qazish va uy-joy qurish normalaridan chetga chiqish, ayanchli oqibatlarga olib kelishi mumkin. Shuning uchun ogoh bo‘ling va tegishli tashkilotlar ruxsati asosida o‘z qurilishlaringizni qonuniy tashkil eting”, — deydi hokimlik vakillari fuqarolarni ogohlantirar ekan.
Izoh (0)