Korrupsiyaga qarshi kurashish agentligi davlat organlari va tashkilotlari faoliyatining ochiqligi yuzasidan 2023-yil birinchi chorak yakunlari bo‘yicha xulosasini eʼlon qildi. Bu haqda agentlik matbuot xizmati “Daryo”ga maʼlum qildi.
Unda aytilishicha, o‘rganish davomida davlat organlari va tashkilotlarida ochiqlik bo‘yicha amalga oshirilayotgan ishlarning samaradorligi va natijadorligini baholashga qaratilgan Ochiqlik indeksida faoliyati “qizil” toifada baholangan 27 ta davlat organlari va tashkilotlariga alohida eʼtibor qaratilgan.
“O‘rganish natijalariga ko‘ra, Jizzax, Sirdaryo va Andijon viloyatlari hokimliklariga, shuningdek, Madaniyat va turizm vazirligi huzuridagi Kinematografiya agentligi, “Aloqabank” ATB, “O‘zavtosanoat” AJlarga ochiqlikni taʼminlash sohasida yo‘l qo‘yilgan kamchiliklarni bartaraf etish hamda xizmat vazifalariga masʼuliyatsizlik bilan yondashgan mansabdor shaxslarga nisbatan tegishli intizomiy jazo chorasini qo‘llash to‘g‘risida taqdimnoma kiritildi”, — deyiladi agentlik axborotida.
Shuningdek, davlat hokimiyati va boshqaruvi organlari faoliyatining ochiqligi to‘g‘risidagi qonunchilikni buzganlik uchun Sanitariya-epidemiologik osoyishtalik va jamoat salomatligi xizmati mansabdor shaxsiga nisbatan Maʼmuriy javobgarlik to‘g‘risidagi kodeksning 215 prim 7-moddasi (davlat hokimiyati va boshqaruvi organlari faoliyatining ochiqligi to‘g‘risidagi qonunchilikni buzish) bilan maʼmuriy bayonnoma rasmiylashtirilib, ko‘rib chiqish uchun sudga yuborilgan.
Qo‘shimcha qilinishicha, mazkur yo‘nalishdagi o‘rganishlar boshqa davlat organlari va tashkilotlari faoliyatida ham davom ettirilmoqda.
2022-yil yakunlari bo‘yicha eʼlon qilingan “Ochiqlik indeksi”da maʼmuriy bayonnoma tuzilmagan, faqat taqdimnomalar kiritish bilan cheklanilgan.
Maʼlumot uchun, Maʼmuriy javobgarlik to‘g‘risidagi kodeksning 215 prim 7-moddasi — Davlat hokimiyati va boshqaruvi organlari faoliyatining ochiqligi to‘g‘risidagi qonunchilikni buzganlik (bundan ushbu kodeksning 175 prim 7 va 229-moddalarida nazarda tutilgan hollar mustasno), jumladan, Ochiq maʼlumotlar sifatida joylashtiriladigan, ijtimoiy ahamiyatga molik bo‘lgan maʼlumotlar ro‘yxatiga kiritilgan maʼlumotlarni eʼlon qilmaganlik yoki to‘liq eʼlon qilmaganlik, eʼlon qilish muddatlariga va tartibiga rioya etmaganlik yoki maʼlumotlarni buzib ko‘rsatganlik — mansabdor shaxslarga bazaviy hisoblash miqdorining uch baravaridan besh baravarigacha miqdorda jarima solishga sabab bo‘ladi.
Xuddi shunday huquqbuzarlik maʼmuriy jazo chorasi qo‘llanilganidan keyin bir yil davomida takror sodir etilgan bo‘lsa — mansabdor shaxslarga bazaviy hisoblash miqdorining besh baravaridan o‘n baravarigacha miqdorda jarima solishga sabab bo‘ladi.
Izoh (0)