Markaziy bank eski namunadagi tanga va banknotlar: 50, 100, 200 va 500 so‘mliklarni almashtirishni qayta boshladi.
“O‘zbekiston Respublikasi Markaziy bankining eski namunadagi 50 va 100 so‘mlik tangalarini, shuningdek, 50, 100, 200 va 500 so‘mlik banknotlarini ayirboshlash hamda muomaladan qaytarib olish tartibi to‘g‘risida”gi nizomga (ro‘yxat raqami 3014, 2018-yil 19-may) asosan eski namunadagi tanga va banknotlarning muomalada bo‘lish muddatlari:
- 2001-2002-yillar namunalaridagi 50 so‘mlik, 2004 va 2009-yil namunalaridagi 100 so‘mlik tangalar hamda 1994-yil namunasidagi 50 va 100 so‘mlik banknotlar uchun 2019-yil 1-iyulgacha;
- 1997-yil namunasidagi 200 so‘mlik, 1999-yil namunasidagi 500 so‘mlik banknotlar uchun 2020-yil 1-iyulgacha belgilangan.
Markaziy bank boshqaruvining 2022-yil 29-yanvardagi qaroriga asosan ushbu eski namunadagi to‘lov qobiliyatini yo‘qotgan pul belgilarini Markaziy bankning Hisob-kitob kassa markazlari orqali amaldagi pul belgilariga almashtirib berish muddati 2023-yilning 1-yanvarigacha uzaytirilgan edi.
Bugungi kunda ayrim hududlarda to‘lov qobiliyatini yo‘qotgan banknotlarni almashtirish yuzasidan fuqarolardan kelib tushayotgan murojaatlarni inobatga olib, Markaziy bank boshqaruvining 2023-yil 3-iyundagi tegishli qaroriga asosan to‘lov qobiliyatini yo‘qotgan eski namunadagi 50, 100, 200 va 500 so‘mlik banknotlarni hamda 50 va 100 so‘mlik tangalarni Markaziy bankning Hisob-kitob kassa markazlari orqali qabul qilish va almashtirib berishni davom ettirish belgilandi.
“Shu munosabat bilan, barcha fuqarolar qo‘lida qolib ketgan eski namunadagi to‘lov qobiliyatini yo‘qotgan yuqorida ko‘rsatilgan nominallardagi banknotlar va tangalarni Markaziy bankning Hisob-kitob kassa markazlarida amaldagi pul belgilariga erkin almashtirib olishlari mumkinligini maʼlum qilamiz”, deyiladi xabarda.
Izoh (0)