Toshkentda ayolni haqorat qilib, unga paket uloqtirgan AQSH fuqarosi jarima to‘ladi

Toshkentda AQSH fuqarosi himoya orderini buzgani va bezorilik qilgani uchun jarima to‘ladi. Bu haqda “Nemolchi.uz” xabar berdi.

Ma’lum qilinishicha, 1962-yilda tug‘ilgan M.P ismli AQSH fuqarosi savdo markazida birga yashaydigan ayol bilan janjallashib, uni haqorat qilgan va unga paketlar uloqtirgan. Bu ayolga nisbatan birinchi agressiv holat emas: jabrlanuvchi avval ham himoya orderini olgan.

9-iyun kuni Jinoyat ishlari bo‘yicha Shayxontohur tuman sudi videokonferensaloqa orqali ochiq sud majlisida AQSH fuqarosini himoya orderi talablarini buzish (O‘zbekiston Respublikasi Ma’muriy javobgarlik kodeksi 206-1-modda) va mayda bezorilik (183-modda) da aybdor deb topdi.

Sudya ayblanuvchining yoshi, oilaviy ahvoli, shuningdek, moddiy ahvolini inobatga olib, unga nisbatan jarima tayinlashni belgiladi:

• Ma’muriy javobgarlik to‘g‘risidagi kodeksning 183-moddasi (mayda bezorilik) bilan 990 ming so‘m;
• Ma’muriy javobgarlik to‘g‘risidagi kodeksning 206-1-moddasiga (Tazyiq o‘tkazgan va (yoki) zo‘ravonlik sodir etgan yoxud ularni sodir etishga moyil bo‘lgan shaxs tomonidan himoya orderi talablarini bajarmaslik) asosan 330 ming so‘m.

Sud tomonidan Ma’muriy javobgarlik to‘g‘risidagi kodeksning 34-moddasi (bir nechta huquqbuzarliklarni sodir etganlik uchun ma’muriy jazo qo‘llash) bilan ayblanuvchiga ikkita huquqbuzarlik uchun jami 990 000 so‘m miqdorida jarima solingan.