Yil oxirigacha “Toshkent – Andijon” muqobil pullik avtomobil yo‘lini qurish bo‘yicha mega-loyiha boshlanadi

O’zLiDePdan prezidentlikka nomzod Shavkat Mirziyoyev andijonlik saylovchilar bilan uchrashuvda “Andijon – Farg‘ona – Qo‘qon – Namangan – Andijon” temir yo‘l halqasi bo‘ylab 4 ta elektropoyezdlar harakati yo‘lga qo‘yilishini aytdi. 

Natijada, kuniga 8 ta qatnov tashkil etilib, 10 mingga yaqin yo‘lovchi tashiladi. Bunga, 40 million dollar jalb qilinadi.

“Shuningdek, Andijon xalqaro aeroporti zamonaviy standartlar asosida to‘liq ta’mirlanadi va bu ishlarga 350 million dollar yo‘naltiriladi”, — dedi nomzod.

Shavkat Mirziyoyev shu yil oxirigacha Jahon banki bilan birga, “Toshkent – Andijon” muqobil pullik avtomobil yo‘lini qurish bo‘yicha 2,5 milliard dollarlik mega-loyiha boshlanishini aytdi. 

“Loyihani amalga oshirish natijasida, Andijondan Toshkent shahriga borish vaqti hozirgi 5 soatdan 3 soatga qisqaradi”, – dedi nomzod andijonlik saylovchilar bilan uchrashuvda.