Қозоғистоннинг Абай вилоятидаги ўрмон ёнғинларида ҳалок бўлганларнинг оилаларига “Қозоғистон халқи” жамғармаси маблағлари ҳисобидан 7 миллион тенгедан (15,6 минг доллар), шунингдек, ҳар бир вояга етмаган бола учун 2 миллион тенгедан (4,4 минг доллар) тўлаб берилади. Бу ҳақда республикаси ҳукуматига таяниб, Central Asia хабар берди.
Бунга параллель равишда қурбонлар ва жароҳатланганларнинг оилаларига зарур ёрдам кўрсатиш учун алоҳида жамғарма ташкил этилган.
Қозоғистоннинг 40 дан ортиқ университетлари ёнғиндан жабр кўрган оилаларнинг фарзандларига грантлар ва ётоқхонадан жой беришга тайёр эканини билдирган. Шу билан бирга, тўлов шартномаси асосида таҳсил олаётган талабалар ва бакалавриат талабаларини грантга ўтказиш кўзда тутилган.
Қозоғистондаги ўрмон ёнғини
Республиканинг Россия билан чегарадош Абай вилоятидаги ўрмон ёнғинлари 8 июнь куни бошланган. Ёнғин майдони 60 минг гектардан ошган. Ушбу ёнғин оқибатида жами 14 киши ҳалок бўлди, улар хотирасига 12 июнь куни Қозоғистонда умуммиллий мотам куни эълон қилинди.
Қозоғистон президенти бўлиб ўтган воқеа учун қурбонларнинг оиласидан узр сўради ва айбдорлар жавобгарликка тортилишини айтди. У қурбонларнинг оиласига моддий ёрдам кўрсатилишини билдирди.
Изоҳ (0)