Qozog‘iston sharqidagi Abay viloyatida yuz bergan o‘rmon yong‘ini qurbonlari soni 14 kishiga yetdi.
Avvalroq o‘rmon xo‘jaligining uch nafar xodimi halok bo‘lgani haqida xabar berilgandi, keyin qidiruv ishlari davomida yana 11 nafar jasad topilgan. Bu haqda Qozog‘iston Favqulodda vaziyatlar vazirligi xabar berdi.
“O‘lganlarning shaxsi aniqlanmoqda”, — dedi vazirlik. Hozirda yong‘inni o‘chirishda 1 mingdan ortiq odam va 252 dona texnika ishtirok etmoqda.
Yong‘in 8 iyunda boshlangan, uning maydoni 60 ming gektarni tashkil qilgan. Qozog‘iston prezidenti Qosim-Jo‘mart To‘qayev voqea fonida Favqulodda vaziyatlar vazirligi rahbarini almashtirdi.