“Qoraqalpog‘istonda maxsus iqtisodiy, kichik va yoshlar sanoat zonalaridagi tadbirkorlarga yer, bino va inshootlar xususiylashtirib beriladi” — Shavkat Mirziyoyev

O‘zLiDePdan prezidentlikka nomzod Shavkat Mirziyoyev Qoraqalpog‘istonda kelgusi yetti yilda jami 2,5 milliard dollar yo‘naltirilishini aytdi. Bu haqda “Daryo” manbasi xabar berdi.

“Eng avvalo, hokim yordamchilari tizimi orqali, har yili kamida 20 mingta loyiha amalga oshirilib, 2030-yilga qadar jami 350 ming aholi bandligi ta’minlanadi. Shu bilan birga, maxsus iqtisodiy, kichik va yoshlar sanoat zonalaridagi tadbirkorlarga yer, bino va inshootlar xususiylashtirib beriladi.

Ausionda 3 oy ichida sotilmagan davlat mulklarini esa, elektron tanlovda eng yaxshi taklif bergan talabgorga sotishga ruxsat beriladi. Mo‘ynoq, Bo‘zatov, Shumanay va Taxtako‘pir uchun, kamida 500 ming dollar investisiya kiritish sharti bilan, yer va binolar “bir so‘m” qiymatda taqdim etiladi”, — deydi Shavkat Mirziyoyev.

Prezidentlikka nomzod mamlakatda ishlab chiqarilmaydigan maxsus texnika, uskuna, butlovchi va ehtiyot qismlarni olib kirishda bojxona bojlari uch yilga bekor qilinishini ta’kidladi.

Bunda, qo‘shilgan qiymat solig‘ini 270 kungacha kechiktirib to‘lash imkoni yaratiladi.