“O‘zbekiston afg‘onistonlik qizlarning orzularini ro‘yobga chiqarishga yordam berayotganidan faxrlanaman” — Saida Mirziyoyeva

12-iyun kuni Surxondaryo viloyati Termiz shahridagi 13 va 26-umumta’lim maktablarining IT oromgohida tahsil olgan o‘quvchi qizlarga sertifikat topshirish marosimi bo‘lib o‘tdi. “Bu men uchun juda muhim voqea bo‘ldi”, deb xabar bermoqda Prezident administratsiyasi sho‘ba mudiri Saida Mirziyoyeva.

Uning yozishicha, maktab o‘quvchilari orasida afg‘onistonlik qizlar ham bo‘lgan.

“Qizlar zamonaviy IT sohasining sir-asrorini egallayotganini ko‘rib, qalbim quvonchga to‘lyapti. Bu IT oromgohi qizlarning o‘zlariga bo‘lgan ishonchlarini uyg‘otishda muhim qadam bo‘ldi. Yoshlar uchun yangi imkoniyatlar ochayotgan bunday oromgohlar, to‘garaklar, o‘ziga xos kurslar mamlakatimiz prezidenti rahbarligida ta’lim sohasida amalga oshirilayotgan islohotlar natijasiga misoldir. 

Shuningdek, ikkala maktab o‘quvchilari orasida afg‘onistonlik qizlar bo‘lib, ular ham ixtisoslashtirilgan oromgohda tahsil olishgani juda muhim. Qo‘shni mamlakatda ta’lim olmoqchi bo‘lgan qiz-ayollar qanday qiyinchiliklarga duch kelishini hammamiz yaxshi anglaymiz. Men O‘zbekiston ularning bir necha nafariga bo‘lsa-da, orzularini ro‘yobga chiqarishga yordam berayotganidan faxrlanaman.

Bugun qo‘liga sertifikat olgan har bir qiz hayotda yuksak marralarni zabt etishiga, o‘zini yuqori malakali mutaxassis sifatida namoyon etishiga umid qilaman va ishonaman”, — deb yozgan Saida Mirziyoyeva.