Toshkent shahar Mirobod tumanida ona va bola 39 yoshli erkakni “samosud” qilib, qo‘llarini bog‘lagan holda omborga qamab qo‘ydi. IIBB holat yuzasidan ma‘lumot berdi.
Ma‘lum bo‘lishicha, ushbu shaxs xonadon egalariga bundan ikki yil ilgari Respublika kadastr agentligida ishlovchi tanishi orqali ularning uyiga kadastr hujjatlarini to‘g‘rilab berishini aytib, 1000 dollar olgan. Ammo shu kungacha hujjatlarni ham qilib bermagan, pulni ham qaytarmagan.
Ushbu erkakdan pullarni qaytarib olish maqsadida ona-o‘g‘il uni uyga chaqirgan va chap yelkasiga pichoq bilan jarohat yetkazgan. Ayol uni temir armatura bilan ham urgan. Shundan so‘ng erkakni uy yerto‘lasiga olib tushib, stulga oyoq-qo‘llarini skotch va sim yordamida bog‘lagan, bir kecha shu holatda qoldirgan. Erkak pullarni qaytarsagina uni qo‘yib yuborishlarini aytgan xonadon egalari uning turmush o‘rtog‘iga qo‘ng‘iroq qildirgan. Rafiqasidan 300 dollar va 700 dollarga teng bir juft tilla zirak va bir dona tilla uzukni olib kelib berishgach, uni qo‘yib yuborishgan.
Erkak oradan 18 kun o‘tgach bu voqea haqida ichki ishlar organlariga xabar bergan. Mazkur holat yuzasidan Jinoyat kodeksining 165-moddasi hamda 138-moddasining tegishli bandlari bilan jinoyat ishi qo‘zg‘atilgan.
Izoh (0)