Qashqadaryo viloyatining Qarshi tumanidagi Charog‘il qishlog‘ida g‘alla yetishtiruvchi 54 ta fermer xo‘jaligining 52 tasida yetishtirilgan g‘alla o‘z vaqtida o‘rib olindi. Tuman hokimi qahriga uchragani aytilayotgan ikkita fermer xo‘jaligi — “SHDF zamin ravnaqi” va “Parizoda Ro‘ziqulova” fermer xo‘jaligiga qarashli 37 gektar maydondagi g‘alla esa hali-hamon o‘rib olinmagan. Bu haqda “Daryo”ga murojaat qilgan fermerlarning aytishicha, mazkur maydondagi g‘allani o‘rishga kirishgan kombaynlarga ham hokim taqiqi qo‘yilgan.
“Biz paxta yetishtirish bo‘yicha avvaldan hamkorlik qilib kelganimiz Naqshab klasteri bilan ishlayapmiz. Tumanimizda avvaliga kooperatsiya ayni paytda esa klaster sifatida faoliyat yuritayotgan tadbirkorlar bilan ishlamayapmiz. Birinchidan avvaldan o‘sha Naqshab klasteri o‘zimizga maʼqul kelgani uchun, qolaversa ishonchimizni qozongani uchun eski hamkorlikni davom ettirayotgandik. Endilikda tuman hokimi bizga shart qo‘yib, eski klaster bilan hamkorlikni to‘xtatib, tumandagi klaster bilan ishlash majburiyatini qo‘ymoqda. Agar bunday qilmasak, g‘allamizga kombayn kirmasligi, g‘allamiz o‘rilmay qolishini aytmoqda”, — deydi bu haqda tahririyatga murojaat qilgan fermerlardan biri “Parizoda Ro‘ziqulova” fermer xo‘jaligi rahbari Bekzod Farmonov.
Yana bir fermer “SHDF zamin ravnaqi” fermer xo‘jaligi rahbari Ravshan Yusupovning aytishicha, ular o‘zi istagan klaster bilan hamkorlik qilgani uchun hokim qahriga uchgan.
“17 gektar maydonga g‘alla yetishtirganmiz. G‘allamiz tayyor. Lekin g‘allani o‘rishga kombayn berilmayapti. Sababi tuman hokimimiz aytgan klaster bilan emas, avvaldan ishlab kelgan klaster-hamkorimiz bilan ishlab kelayotgandik. Bu hokimga yoqmagani uchun hokim bizga tumandagi klaster bilan ishlash shartini qo‘ymoqda. Agar eski hamkorimiz bilan ishlashda davom etsak, g‘allamizga kombayn berilmasligi, shuncha mehnatimizga kuyib qolishimiz aytildi”, — deydi fermer Ravshan Yusupov.
“Daryo” fermerlar ayblovi bo‘yicha Qarshi tumani hokimligi masʼullari bilan muloqot qildi.
Tahririyatning bu haqdagi savollariga javob bergan Qarshi tumani hokimligi axborot xizmati rahbari To‘lqin Turdiyev shaxsan hokimning o‘zi fermerlar iddaosini rad etganini, Charog‘il hududidagi fermerlar g‘allasi navbati bilan o‘rib kelinayotganini maʼlum qildi.
“Bu masalada hech qanday muammo yo‘q. Fermerlarga bunday taqiq qo‘yilmagan. Charog‘il hududidagi mavjud 54 ta fermerning g‘alla maydoni navbati bilan o‘rilmoqda. Shu kecha kunduzgacha 50 ta fermer g‘allasi o‘rilgan bo‘lsa, kecha kechasi qolgan to‘rtta fermerlardan birining g‘allasi o‘rilgan. Ayni paytda esa (soat 15:30 lar atrofi —tahr.) o‘sha to‘rtta fermer xo‘jaligidan yana birining dalasi o‘rilmoqda. Sizga shikoyat qilgan ikkita fermer xo‘jaligining g‘allasi esa bugun kechki payt o‘rib olinadi”, — deydi hokimlik axborot xizmati rahbari To‘lqin Turdiyev.
Maqola eʼlon qilinayotgan paytda fermer Bekzod Farmonov tahririyatga aloqaga chiqib, “Daryo” so‘rovidan so‘ng hokimlik masʼullaridan iborat vakillar kelib, g‘alla o‘rimiga yaroqsiz bo‘lgan 2 ta kombayn keltirishganini, ammo bu kombaynlar g‘alla o‘rimiga yaroqsiz bo‘lgani bois, g‘allasi bu kombaynlar bilan o‘rilishiga qarshilik qilganini bildirdi.
“Daryo” voqealar rivojini kuzatishda davom etadi.
Izoh (0)