Qishloq xo‘jaligi vazirligi “Mahalliy kartoshka yetishtirishni ko‘paytirish va urug‘chilik bazasini yanada mustahkamlash bo‘yicha qo‘shimcha chora-tadbirlari to‘g‘risida”gi hukumat qarori loyihasini muhokamaga qo‘ydi.
Hujjat loyihasida belgilanishicha, Andijon, Jizzax, Qashqadaryo, Namangan, Samarqand, Farg‘ona va Toshkent viloyatlari hokimliklari Qishloq xo‘jaligida xizmatlar ko‘rsatish agentligi bilan birgalikda ikki oy muddatda hududlarning tuproq-iqlim sharoitlariga mos yuqori avlodli urug‘lik kartoshka yetishtirish, fermer xo‘jaliklari va boshqa qishloq xo‘jaligi korxonalariga arzon mahalliy urug‘lik yetkazib berishni tashkil etish maqsadida kartoshka urug‘chiligiga ixtisoslashgan elita urug‘chilik xo‘jaliklari faoliyatini yo‘lga qo‘yilishini ta’minlaydi.
Kartoshka urug‘chiligini yo‘lga qo‘yishda ilmiy-tadqiqot muassasalari, klasterlar va boshqa urug‘chilik xo‘jaliklarining asosiy vazifalari etib quyidagilar belgilanmoqda:
- hududlarning tuproq-iqlim va suv sharoitlaridan kelib chiqib, yuqori avlodli sertifikatlangan urug‘lik kartoshka ekilishini taʼminlash;
- agrotexnik tadbirlarga rioya qilgan holda urug‘lik kartoshka maydonlarini aprobatsiyadan o‘tkazib, urug‘liklarni nav va avlodlari bo‘yicha alohida jamg‘arish;
- yetishtirilgan urug‘lik kartoshkani keyingi mavsumda qishloq xo‘jaligi mahsulotlari ishlab chiqaruvchilariga yetkazib berish uchun maxsus saqlash omborlarini tashkil etish;
- fermer va qishloq xo‘jaligi korxonalariga asosiy, takroriy maydonlarga sertifikatlangan urug‘lik kartoshkani yetkazib berish;
- urug‘lik kartoshkani yetishtirish, parvarishlash, o‘simliklarni himoya qilish tadbirlarini o‘tkazish hamda yangi innovatsion texnologiyalarni joriy qilish bo‘yicha mahalliy va xorijiy ilmiy tadqiqot institutlari olimlari bilan hamkorlikni yo‘lga qo‘yish.
Qishloq xo‘jaligi vazirligi va Samarqand viloyati hokimligining Toshkent davlat agrar universiteti Samarqand filialida 2023—2027-yillarda Koreya hukumatining 4,1 million dollar texnik ko‘mak mablag‘lari asosida kartoshka urug‘chiligida “Ilm-taʼlim-ishlab chiqarish” tamoyili bo‘yicha “Kartoshka urug‘chiligi markazi”ni tashkil etish to‘g‘risidagi takliflariga rozilik berilmoqda.
Bunda, in vitro asosida “laboratoriya-dala-dasturxon” tamoyili asosida sifatli kartoshka yetishtirishning to‘liq siklini yo‘lga qo‘yish maqsadida koreyalik mutaxassislarni jalb qilib, ilmiy-tadqiqotlar olib borish va kartoshka urug‘lik yetishtiruvchilar bilimi va malakalarini oshirish yo‘lga qo‘yiladi.
O‘zbekistonda kartoshka yetishtirish
2022-yilda O‘zbekistonda 3,4 million tonnadan ortiq kartoshka yetishtirilgan, bu o‘tgan yilning shu davriga nisbatan 4,8 foizga ko‘p.
Kartoshka meva-sabzavot segmentida mamlakatning eng yirik import qiluvchi mahsulotidir. 2022-yil oxiriga kelib, O‘zbekiston sotib olgan kartoshkaning umumiy hajmi 515–525 ming tonna oralig‘ida bo‘ldi — bu 2021-yilgi rekord ko‘rsatkichga nisbatan 4-6 foizga kam.
O‘zbekistonda 2022-yil oxirigacha kartoshkani olib kirish va sotishda qo‘shilgan qiymat solig‘i nolga teng bo‘lgan.
Izoh (0)