Қишлоқ хўжалиги вазирлиги “Маҳаллий картошка етиштиришни кўпайтириш ва уруғчилик базасини янада мустаҳкамлаш бўйича қўшимча чора-тадбирлари тўғрисида”ги ҳукумат қарори лойиҳасини муҳокамага қўйди.
Ҳужжат лойиҳасида белгиланишича, Андижон, Жиззах, Қашқадарё, Наманган, Самарқанд, Фарғона ва Тошкент вилоятлари ҳокимликлари Қишлоқ хўжалигида хизматлар кўрсатиш агентлиги билан биргаликда икки ой муддатда ҳудудларнинг тупроқ-иқлим шароитларига мос юқори авлодли уруғлик картошка етиштириш, фермер хўжаликлари ва бошқа қишлоқ хўжалиги корхоналарига арзон маҳаллий уруғлик етказиб беришни ташкил этиш мақсадида картошка уруғчилигига ихтисослашган элита уруғчилик хўжаликлари фаолиятини йўлга қўйилишини таъминлайди.
Картошка уруғчилигини йўлга қўйишда илмий-тадқиқот муассасалари, кластерлар ва бошқа уруғчилик хўжаликларининг асосий вазифалари этиб қуйидагилар белгиланмоқда:
- ҳудудларнинг тупроқ-иқлим ва сув шароитларидан келиб чиқиб, юқори авлодли сертификатланган уруғлик картошка экилишини таъминлаш;
- агротехник тадбирларга риоя қилган ҳолда уруғлик картошка майдонларини апробациядан ўтказиб, уруғликларни нав ва авлодлари бўйича алоҳида жамғариш;
- етиштирилган уруғлик картошкани кейинги мавсумда қишлоқ хўжалиги маҳсулотлари ишлаб чиқарувчиларига етказиб бериш учун махсус сақлаш омборларини ташкил этиш;
- фермер ва қишлоқ хўжалиги корхоналарига асосий, такрорий майдонларга сертификатланган уруғлик картошкани етказиб бериш;
- уруғлик картошкани етиштириш, парваришлаш, ўсимликларни ҳимоя қилиш тадбирларини ўтказиш ҳамда янги инновацион технологияларни жорий қилиш бўйича маҳаллий ва хорижий илмий тадқиқот институтлари олимлари билан ҳамкорликни йўлга қўйиш.
Қишлоқ хўжалиги вазирлиги ва Самарқанд вилояти ҳокимлигининг Тошкент давлат аграр университети Самарқанд филиалида 2023—2027 йилларда Корея ҳукуматининг 4,1 миллион доллар техник кўмак маблағлари асосида картошка уруғчилигида “Илм-таълим-ишлаб чиқариш” тамойили бўйича “Картошка уруғчилиги маркази”ни ташкил этиш тўғрисидаги таклифларига розилик берилмоқда.
Бунда, ин витро асосида “лаборатория-дала-дастурхон” тамойили асосида сифатли картошка етиштиришнинг тўлиқ циклини йўлга қўйиш мақсадида кореялик мутахассисларни жалб қилиб, илмий-тадқиқотлар олиб бориш ва картошка уруғлик етиштирувчилар билими ва малакаларини ошириш йўлга қўйилади.
Ўзбекистонда картошка етиштириш
2022 йилда Ўзбекистонда 3,4 миллион тоннадан ортиқ картошка етиштирилган, бу ўтган йилнинг шу даврига нисбатан 4,8 фоизга кўп.
Картошка мева-сабзавот сегментида мамлакатнинг энг йирик импорт қилувчи маҳсулотидир. 2022 йил охирига келиб, Ўзбекистон сотиб олган картошканинг умумий ҳажми 515–525 минг тонна оралиғида бўлди — бу 2021 йилги рекорд кўрсаткичга нисбатан 4-6 фоизга кам.
Ўзбекистонда 2022 йил охиригача картошкани олиб кириш ва сотишда қўшилган қиймат солиғи нолга тенг бўлган.
Изоҳ (0)