AQSHning Toshkentdagi elchisi Jonatan Xenik Alter Ego loyihasiga bergan intervyusida O‘zbekiston fuqarolariga AQSH vizasi berishni rad etish darajasi yuqori ekaniga izoh berdi.
Markaziy Osiyo davlatlari orasida O‘zbekiston fuqarolarining AQSH vizasini olish uchun bergan arizalari rad etilishi bo‘yicha ikkinchi o‘rinda turadi. Hatto Turkmaniston fuqarolari o‘zbekistonliklardan ko‘proq viza oladi.
“Men vizalar berilish sonini solishtirmayman, chunki boshqa davlatlar raqamlari bilan tanish emasman. Biroq shuni aytishim mumkinki, biz uchun yuzma-yuz suhbatlar o‘tkazish juda qiyin bo‘lgan kovid davridagi turg‘unlikdan so‘ng o‘tgan yili ko‘proq odamlar bilan suhbatlashdik va 2022-yilda koronavirusdan oldingi 2019-yildagidan ko‘ra ko‘proq viza berdik. Bilasizmi, biz to‘liq ishga qaytdik va har qachongidan ham ko‘proq odamlar bilan suhbatlashyapmiz. Talabgorlar soni har qachongidan ham ko‘pligi aslida juda yaxshi belgidir”, — deydi Xenik.
Elchining taʼkidlashicha, AQSHga sayohat qilish istagida bo‘lganlar, jumladan, talabalar va tadbirkorlar soni ham ortib bormoqda. Elchixona AQSHga borishni imkon qadar ko‘paytirish va osonlashtirish, shuningdek, ikki davlat manfaatlari yo‘lida imkon qadar ko‘proq aloqa o‘rnatish niyatida.
Shu bilan birga elchi AQSH ko‘plab viza so‘rovlariga shunchaki rad javobini berishi, buning sababini ochiqlamasligi to‘g‘risidagi savolga ham javob bergan.
“Afsuski, har doim viza so‘rovi rad etiladigan odamlar bo‘ladi. O‘ylaymanki, siz ham juda yaxshi bilasiz, so‘nggi oylarda biz, masalan, O‘zbekistonning ko‘plab fuqarolari Meksikaga borib, so‘ng noqonuniy ravishda AQSH chegarasini kesib o‘tishga urinayotganiga guvoh bo‘ldik. Men ular bu ishni Disneyland’ga borish uchun qilishgan deb o‘ylamayman. To‘g‘rimi? Ular buni AQSHda turistik viza bo‘yicha qonuniy bo‘lmagan iqtisodiy imkoniyatlarni ko‘rganlari uchun qiladi”, — deydi elchi.
Jonatan Xenikning taʼkidlashicha, O‘zbekistonning millionlab fuqarolari mamlakatdagi og‘ir iqtisodiy vaziyat tufayli oilasini boqish uchun Rossiyada mehnat qilmoqda.
“Va, tabiiyki, O‘zbekiston fuqarolari AQSH va boshqa mamlakatlardan iqtisodiy imkoniyatlarni izlaydi. Lekin, albatta, siz bilasizki, AQSH Kongressi tomonidan bizga qo‘yilgan majburiyatlar bor va biz AQSHga viza bilan boradigan har bir kishi, sayyohlik vizasi bo‘ladimi yoki talabalik vizasi bo‘ladimi, bu vizalar bilan qonuniy ravishda sayohat qilishiga ishonch hosil qilishimiz kerak. Shuning uchun, kimdir viza uchun murojaat qilsa, lekin biz uning niyati AQSHga sayyoh sifatida sayohat qilish emas, boshqa narsa ekanligini bilsak, afsuski, qonun bo‘yicha uning so‘rovini rad etishimiz kerak bo‘ladi”, — deb tushuntirdi u.
Diplomatning qayd etishicha, 2022-yilda AQSHning Toshkentdagi elchixonasi “har qachongidan ham ko‘proq vizalarni rasmiylashtirgan”.
2022-yilda AQSHning Toshkentdagi elchixonasi murojaat qilgan O‘zbekiston fuqarolarining 47,04 foiziga B toifali viza (sayyohlik va ishbilarmonlik vizasi) berishdan bosh tortgan. Bu 2021-yildagi 45,98 foizlik ko‘rsatkichdan yuqori, ammo 2020-yil pandemiya davridagi — 74,14 foiz, 2019-yildagi — 68,06 foiz, 2018-yildagi — 61,76 foiz va 2017-yildagi — 50,29 foizdan kam.
Izoh (0)