Turkiyada o‘tkazilgan “Eng ilg‘or mergan” xalqaro musobaqasida O‘zbekiston Mudofaa vazirligi merganlari jamoasi ikkinchi o‘rinni qo‘lga kiritdi. Bu haqda vazirlik matbuot xizmati “Daryo”ga ma’lum qildi.
Ma’lum qilinishicha, Isparta shahridagi “Komando” tog‘ o‘quv mashqlar markazida o‘tkazilgan musobaqada Ispaniya, Pokiston, Qatar, Birlashgan Arab Amirliklari singari o‘ndan ortiq davlatlar vakillari ishtirok etgan.
Musobaqa davomida “Qayiqdan va minoralardan o‘q otib orolni himoya qilish”, “Vertolyot va yerdan jang olib borib, yaradorni evakuatsiya qilish”, “Harakatlanuvchi nishonlarni pistoletda yakson etish”, “Tungi vaqtda magnit azimuti bo‘yicha harakatlanish” kabi qator shartlar real jang vaziyatiga yaqinlashtirilgan holda olib borilgan.
Qariyb 10 kun davom etgan bellashuvlarda xorijiy davlat armiyalarining 42 ta jamoasi ichida O‘zbekiston Mudofaa vazirligi harbiy xizmatchilari faxrli 2-o‘rinni qo‘lga kiritgan. Shohsupaning birinchi va uchinchi o‘rinlari mezbon davlat vakillariga nasib etgan.
.jpg)
Mart oxirlarida O‘zbekiston Mudofaa vazirligi harbiy xizmatchilari AQSHda bo‘lib o‘tgan “Eng ilg‘or jangchi — 2023” musobaqasida g‘olib bo‘lgandi. Shuningdek, O‘zbekiston harbiy shifokorlari Janubiy Koreyadagi xalqaro kurslarda malaka oshirishi, O‘zbekiston armiyasi dunyodagi eng kuchli armiyalar reytingida 62-o‘rinni egallagani to‘g‘risida xabar berilgandi.
Izoh (0)