Toshkent shahar adliya boshqarmasi sobiq mansabdorlariga nisbatan jinoyat ishi qo‘zg‘atilgani haqida xabar berilgan edi. Vazirlik holat yuzasidan munosabat bildirdi.
Unga ko‘ra, vazirlikning ichki audit xizmati 2022-yil dekabr – 2023-yil fevral oylarida 2019-2022-yillarda davlat xizmatlari ko‘rsatishda noto‘g‘ri to‘langan yoki xizmatdan foydalanilmagan mablag‘larni yuridik va jismoniy shaxslarga qaytarishda belgilangan tartibga rioya etilishi o‘rganilgan. O‘rganishda sobiq Davlat xizmatlari agentligi Toshkent shahar boshqarmasida 864 million so‘m va Samarqand viloyat boshqarmasida 394 million so‘m jismoniy va yuridik shaxslarga qaytarishi lozim bo‘lgan mablag‘lar ayrim buxgalteriya va davlat xizmati markazi xodimlari tomonidan o‘zlashtirilgani aniqlangan.
Ko‘rilgan choralar natijasida o‘zlashtirilgan mablag‘lar to‘liq qaytarilishi taʼminlangan. Aybdor 7 nafar xodim lavozimidan ozod etilgan hamda jinoiy javobgarlik masalasini hal etish uchun to‘plangan materiallar shu yil fevral oyida prokuratura organlariga yuborilgan.
“Adliya tizimida faoliyat yuritayotgan har bir xodim o‘z vazifasini halol va vijdonan bajarishi eng yuksak qadriyat hisoblanadi. Bu qadriyatga rioya qilmagan har qanday xodimga nisbatan keskin choralar ko‘riladi”, — deyiladi xabarda.
Izoh (0)