Toshkent viloyati hokimi Zoir Mirzayevning aytishicha, hokimlar qabulida bo‘lib moddiy yordam undirishni o‘ziga kasb qilib olgan fuqarolar ham bor. Bu haqda hokim Ohangaron tumanida bo‘lib o‘tgan sayyor qabulida maʼlum qildi.

Taʼkidlanishicha, Toshkent viloyati hokimi Zoir Mirzayevning navbatdagi sayyor qabuli viloyatning Ohangaron tumanidagi Beshqo‘l qishlog‘ida bo‘lib o‘tgan.

“Daryo” jurnalistining aniqlashtirishicha, sayyor qabulda viloyat hokimi tomonidan 130 nafar fuqaro muammosi tinglanib, moddiy yordam so‘rab kelganlarning aksariyatiga mablag‘ vaʼda qilingan.

“Moddiy yordam olishni o‘ziga kasb qilib olganlar ham bor. Ikkinchidan moddiy yordam so‘rab kelgan odamning ko‘ziga qarasangiz, haqiqatdan ham muhtojmi yo‘qmi bilasiz, albatta. Pul so‘ralganda ‘sizga palon so‘m beramiz’, deb to‘g‘ridan to‘g‘ri aytmaymiz, yonimizda deputatlar turgan bo‘ladi, ularning xulosasini olib, so‘ngra so‘ralgan va vaʼda qilingan pul beriladi. Mening qo‘limdagi pul, men vaʼda qilayotgan pul davlatimiz rahbari bergan pullar. O‘sha pul joyiga yetib borishiga masʼul inson sifatida murojaatchilarning og‘ziga siqqan pul berilmasligini, haqiqiy muhtojlarga berilib, adolatli sarflanishini nazorat qilamiz. Haqiqiy muhtojlarga pul bersak, fuqaroga ham yoqadi, shaffoflik ham bo‘ladi. Yaratganga ham yoqadi”, — deydi viloyat rahbari Zoir Mirzayev.

Toshkent viloyati hokimi avvalroq bir kunlik qabulida moddiy yordamga muhtojlarga kamida 350-400 million so‘m mablag‘ sarflanishini aytib, “Hokimiyat tizimida ishlayotganimga 22 yil bo‘lgan bo‘lsa, oxirgi olti yildagidek qo‘limda mablag‘ bo‘lmagan. Mablag‘ yo‘qligida odamlarning oldiga borolmaysiz ham. Ko‘chamni ta’mirlab ber desa, yoki uyimni ta’mirlab bersa, nima deyman, nima deb javob beraman deb istihola qilib, qochib yurgan paytlarimiz ham bo‘lgan. Buni tan olish kerak”, — degandi.